-0.9 C
Yerevan
Wednesday, February 1, 2023

«Արևածագ Արցախում». Shtigen Group-ի նպատակն է հասնել Արցախի էներգետիկ անկախությանը

Վերջին լուրերը

«Արևածագ Արցախում». Shtigen Group-ի նպատակն է հասնել Արցախի էներգետիկ անկախությանը
Նանէ Հայրապետյան
Բազմաթիվ ինչուների պատասխանի հետևից գնալու համար, նախ ընտրեցի ԵՊՀ ժուռնալիստիկայի ֆակուլտետի ճանապարհը, հետո քաղաքական ինչուները տարան Պետական Կառավարման Ակադեմիա ու ստացա քաղաքագիտության մագիստրոսի կոչում: Բարև Ձեզ, ես Նանէ Հայրապետյանն եմ, այս հարթակում պատմում եմ ՏՏ-ի, բիզնեսի և ինովացիաների մասին: Եթե ունեք հարցեր կամ թեմաներ, որոնց կուզեք որ անդրադառնանք, գրեք ինձ հետևյալ հարթակններում:

Արցախում էներգետիկ անկախություն հաստատելու առաջին քայլը կատարեց Shtigen Group-ը. Արցախյան պատերազմներում զոհված, հաշմանդամություն ձեռք բերած անձանց և բազմազավակ 12 ընտանիքի անվճար արևային ջրատաքացուցիչ է տրամադրել՝ այսպիսով հայտարարելով «Արևածագ Արցախում» նախագծի մեկնարկի մասին։

Նախագծի նպատակն է, արևային էներգիան օգտագործելով, Արցախը դարձնել էներգետիկ առումով ինքնաբավ և անխոցելի։  Արևային էներգետիկան Արցախ «տանելու» գաղափարը Shtigen Group-ի հիմնադիր տնօրեն Հայկ Շեկյանի մտքում վաղուց կար, բայց մինչև 2019 թվականը տարբեր պատճառներով այն «միս ու արյուն» չէր ստանում: 

«Արևածագ Արցախում». Shtigen Group-ի նպատակն է հասնել Արցախի էներգետիկ անկախությանը
Shtigen Group-ի հիմնադիր տնօրեն Հայկ Շեկյան

«2019 թվականին օրենք ընդունվեց  Արցախում, ըստ որի՝ ինքնավար արտադրությունը դարձավ թույլատրելի, այսինքն՝  տների կտուրներին կարելի էր արևային վահանակներ տեղադրել և «Արցախէներգոյի» հետ հոսանք փոխանակել՝ բավականին գրավիչ պայմաններով: Մեր գործունեության համար, այդպիսով, նպաստավոր դաշտ ստեղծվեց, ինչին մենք անմիջապես արձագանքեցինք: Կազմակերպեցինք «Արևային Արցախ» խորագրով համաժողովը, որի նպատակն էր Արցախում հասանելի դարձնել արևային էներգիայի ընձեռած հնարավորությունները՝ նպաստելով ոլորտի զարգացմանը։ 2019-ից մեկնարկած գործընթացը, փաստացի,  «Արևածագ Արցախում» նախագծի ներքո համակարգային դրսևորում է ստանում»,- պատմեց Հայկ Շեկյանը: 

ԵՊՀ-ում բացվեց YSU-Krisp AI Lab գիտակրթական հետազոտական կենտրոնը

«Արևածագ Արցախում» նախագծի շրջանակում տրամադրված 12 արևային ջրատաքացուցիչները ոչ միայն Ստեփանակերտում, այլև մարզային բնակավայրերում են տեղադրվել։ Shtigen Group-ի մասնագետներն ավելի քան 10 oր այդ նպատակով Արցախում էին։

 «Հատկապես պատերազմից հետո մեր նպատակն է հասնել այն հանգրվանին, որ Արցախում յուրաքանչյուր տուն ունենա իր արևային կայանն ու ջրատաքացուցիչը։ Այդպես մենք կապահովագրենք  Արցախը թշնամու կողմից իրականացվող էներգետիկ ահաբեկչությունից, և գազամատակարարման խափանումների դեպքում Արցախի բնակչությունը կշարունակի տաք ջուր ու էլեկտրաէներգիա ունենալ։ Միաժամանակ կթեթևանա էլեկտրացանցի ծանրաբեռնվածությունը, և չեն լինի նոր խափանումներ էներգահամակարգում»,- ասում է Shtigen Group-ի հիմնադիր տնօրեն Հայկ Շեկյանը։

Արցախում գործող 36 ՀԷԿ-երից 30-ը 44-օրյա պատերազմից հետո անցան թշնամու տիրապետության տակ։ Մինչև պատերազմն Արցախն էներգետիկ առումով ոչ միայն ինքնաբավ էր, այլև կարողանում էր էլեկտրաէներգիա արտահանել Հայաստան։ Այժմ պատկերը ճիշտ հակառակն է՝ Արցախն ապահովում է էլեկտրաէներգիայի ներքին սպառման 50 տոկոսը, իսկ մյուս 50-ը ներմուծվում է Հայաստանից։

«Այս 12 ջրատաքացուցիչն առաջին քայլն է, որով մենք ցույց ենք տալիս, որ ոչ միայն այդ ծրագրի գաղափարակիրն ենք և իրականացնողը,  այլև մասնակիցը, այդ թվում՝ միջոցներ հատկացնելու տեսանկյունից: Մենք դրել ենք մեծ նպատակ և ամեն ջանք գործադրելու ենք այդ նպատակին հասնելու համար»,-ասաց Հայկ Շեկյանը՝ ավելացնելով, որ նախագիծը նաև բնապահպանական մեծ նշանակություն ունի ոչ միայն մեր հայրենիքի, այլև ամբողջ մոլորակի համար։ 

Ըստ Shtigen Group-ի՝ 300 լիտր տարողությամբ 1 արևային ջրատաքացուցիչը 1 օրում խնայում է 16 ԿՎՏ/ժ Էլեկտրաէներգիա: Եթե Ստեփանակերտի 10 000 տներում ու բնակարաններում տեղադրվեն արևային ջրատաքացուցիչներ, այդ թիվը տարեկան կստացվի 58 միլիոն ԿՎՏ/ժ, հետևաբար 40-65 տոկոսով  կխնայվի Սարսանգի ջրամբարի թողունակությունը։ 

Բոլոր նրանք,  ովքեր կցանկանան  միանալ նախաձեռնությանը՝ իրենց ներդրումով դառնալով «Արևածագ Արցախում» արշավի անմիջական մասնակիցը,կարող են կապ հաստատել հետևյալ էլեկտրոնային հասցեով՝ sunrise@shtigen.com:  

Shtigen Group-ը հիմնադրվել է 2011 թ․՝ նպատակ ունենալով խնայող և անվտանգ էներգետիկ համակարգերն ու տեխնոլոգիական լուծումները հասանելի դարձնել աշխարհի յուրաքանչյուր բնակչի։  Shtigen Group-ը ՀՀ արևային էներգետիկայի շուկայի առաջատարներից է, ՀՀ առաջին 500 խոշոր հարկատուներից։   

«Արևածագ Արցախում». Shtigen Group-ի նպատակն է հասնել Արցախի էներգետիկ անկախությանը
Shtigen Group-ի հիմնադիր տնօրեն Հայկ Շեկյան

Տեխնոլոգիական և բիզնես ոլորտի այլ նորությունների ծանոթացե՛ք՝ միանալով մեր Տելեգրամյան ալիքին։

Կարդացե՛ք նաև

spot_img
spot_img

Ամենաընթերցվածները