ՀՀ կառավարության հունիսի 11-ի նիստում ընդունված որոշմամբ՝ հուլիսի 1-ից Հայաստանի բոլոր մարզերում և Երևանում կներդրվի ընտանիքի անապահովության գնահատման նոր համակարգ, որն ամբողջությամբ կփոխարինի տարիներ շարունակ գործող «Փարոսին»։
Աշխատանքի և սոցիալական հարցերի նախարար Արսեն Թորոսյանի խոսքով՝ նոր համակարգը նախորդ տարվա ապրիլից փորձարկվել է Կոտայքի և Սյունիքի մարզերում, իսկ հուլիսից արդեն դիմող բոլոր ընտանիքների կարիքները կգնահատվեն նոր չափորոշիչներով: Գլխավոր հայեցակարգային փոփոխությունն այն է, որ պետությունը նպատակ չունի քաղաքացիներին պահել նպաստային համակարգում: Փոխարենը, կրթության, զբաղվածության և ինքնազբաղվածության գործիքների միջոցով խրախուսվելու է նրանց աշխատանքն ու կենսամակարդակի բարձրացումը:
Վիճակագրությունը ցույց է տալիս, որ նպաստառու ընտանիքների թիվն էապես նվազել է. եթե 2017 թվականին համակարգում գրանցված էր շուրջ 100 հազար ընտանիք, ապա 2026 թվականի հունիսի 1-ի դրությամբ այդ թիվը կազմում է ընդամենը 46 հազար: Ըստ կառավարության ներկայացուցիչների՝ սա աշխատատեղերի ստեղծման արդյունք է, իսկ ծայրահեղ աղքատության ցուցանիշը Հայաստանում այժմ ձգտում է զրոյի:
Ի՞նչ է առաջարկում նոր համակարգը
- Սոցիալական աջակցությունը դառնալու է շատ ավելի հասցեական: Կներդրվի խնդրի արձանագրումից մինչև դրա լուծումը տանող հստակ ձևաչափ։
- Բացի ուղիղ ֆինանսական օգնությունից, կարիքավոր ընտանիքներին կառաջարկվեն նաև ոչ ֆինանսական ծառայությունների փաթեթներ՝ ուղղված կրթական, առողջապահական և սոցիալական առաջնային կարիքների բավարարմանը:
- Նախատեսվում է ընտանիքների կարողությունների զարգացման միջոցով ստեղծել աղքատության փուլային հաղթահարման մոդել։
Ըստ Կառավարության ծրագրի՝ նպատակ է դրված մինչև 2026 թվականն ամբողջությամբ վերացնել ծայրահեղ աղքատությունը երկրում։
