Համաշխարհային բանկը հրապարակել է «Business Ready 2025» (B-READY) զեկույցը, որը փոխարինելու է եկել նախկին «Doing Business» վարկանիշին:
Նոր մեթոդաբանությամբ Հայաստանն արձանագրել է 66,7 միջին միավոր՝ զբաղեցնելով 37-րդ հորիզոնականը գնահատված 101 երկրների շարքում: Մեր հարևան Ադրբեջանը 66 միավորով զբաղեցրել է 38-րդ տեղը, իսկ Վրաստանը 75,1 միավորով հայտնվել է աշխարհի լավագույն քառյակում:
Ի տարբերություն նախկին մոտեցումների, B-READY ինդեքսն առավել համապարփակ է և գնահատում է ոչ միայն օրենսդրական դաշտը, այլև հանրային ծառայությունների մատուցման որակն ու կանոնների գործնական կիրառելիությունը։
Հայաստանն ամենաբարձր արդյունքն արձանագրել է կարգավորող դաշտի ուղղությամբ՝ ստանալով 72,91 միավոր: Հանրային ծառայությունների մակարդակը գնահատվել է 66,05, իսկ գործառնական արդյունավետությունը՝ 61,18 միավոր: Ըստ առանձին թեմաների՝ Հայաստանը բացառիկ բարձր ցուցանիշ ունի գործարարությամբ զբաղվելու մեկնարկի փուլում՝ 95,95 միավոր, ինչպես նաև ֆինանսական ծառայությունների հասանելիության ոլորտում՝ 85,04 միավոր:
Առաջատարների թվում են Սինգապուրը, Կորեայի Հանրապետությունը և Չեխիան։ Ռուսաստանը, Ուկրաինան և Բելառուսը, այս տարվա վարկանիշում բացակայում են:
