DeepSeek-ի հիմնադիր Լյան Վենֆենը դարձել է արհեստական բանականության ոլորտի ամենահարուստ հիմնադիրը՝ առաջ անցնելով Anthropic-ի համահիմնադիր Դարիո Ամոդեյից և OpenAI-ի նախագահ Գրեգ Բրոքմանից։
Ըստ Bloomberg Billionaires Index-ի նոր գնահատականի՝ Լյանի կարողությունը հասել է մոտ 36 մլրդ դոլարի։ Մինչ այդ այն գնահատվում էր շուրջ 16.7 մլրդ դոլար։
Վերագնահատումը հաջորդել է DeepSeek-ի՝ հունիսին իրականացրած 7.4 մլրդ դոլարի ֆինանսավորման փուլին։ Սա ընկերության առաջին արտաքին ներդրումային փուլն էր, որի արդյունքում DeepSeek-ի գնահատականը մոտ 10 մլրդ դոլարից բարձրացել է մինչև շուրջ 50 մլրդ դոլար։
Ֆինանսավորման արդյունքում Լյան Վենֆենի մասնաբաժինը նվազել է, սակայն, ըստ հրապարակման, շարունակում է մնալ մոտ 78%։ Ներդրումային փուլի առանձնահատկություններից մեկն այն է, որ Լյանը ներդրել է նաև սեփական միջոցները՝ մոտ 3 մլրդ դոլար, որը կազմել է ընդհանուր ֆինանսավորման շուրջ 40%-ը։
Այդ միջոցները, ըստ հրապարակման, ստացվել են High-Flyer քվանտային հեջ-ֆոնդի շահույթներից։ Լյանը High-Flyer-ը համահիմնադրել է 2016 թվականին, իսկ DeepSeek-ը դրանից առանձնացել է 2023 թվականի հուլիսին։
DeepSeek-ի աճը վերջին ամիսներին դարձել է AI շուկայի ամենաքննարկվող թեմաներից մեկը։ 2025 թվականի հունվարին ընկերության R1 մոդելի թողարկումը մեծ արձագանք առաջացրեց տեխնոլոգիական շուկաներում և DeepSeek-ը դարձրեց Չինաստանի AI ոլորտի ամենաազդեցիկ խաղացողներից մեկը։
Ըստ հրապարակման՝ նոր ֆինանսավորման շրջանակում DeepSeek-ը պատրաստվում է շարունակել կենտրոնանալ արհեստական ընդհանուր բանականության՝ AGI-ի զարգացման վրա և պահպանել բաց կոդով մոդելներ թողարկելու ռազմավարությունը՝ առանց կարճաժամկետ կոմերցիոնացման վրա հիմնական շեշտ դնելու։
Միևնույն ժամանակ, նշվում է, որ Լյանի կարողության գնահատականները պետք է դիտարկել որոշակի վերապահումով։ DeepSeek-ը մասնավոր ընկերություն է, և դրա բաժնետոմսերը հանրային շուկայում չեն վաճառվում։ Հետևաբար, կարողության հաշվարկները հիմնված են մասնավոր ներդրումային փուլի գնահատականի և Լյանի բաժնեմասի վերաբերյալ հաշվարկների վրա։
DeepSeek-ի ներդրումային փուլի գնահատականները տարբեր աղբյուրներում տատանվել են 45-59 մլրդ դոլարի միջակայքում, մինչդեռ Bloomberg-ի հաշվարկում օգտագործվել է 50 մլրդ դոլար գնահատականը։
