Պետական Եկամուտների կոմիտեի՝ 2023թ. առաջին եռամսյակի 1000 խոշոր հարկատուների ցանկում կա տեղեկատվական տեխնոլոգիաների ոլորտի 65 ընկերություն: Թիվը հաշվել է Modex գործակալությունը՝ ներառելով ոլորտի միայն այն ընկերություններին, որոնց շրջանառության 50%-ից ավելին առաջանում է հենց ՏՏ ոլորտի ապրանքներից և ծառայություններից:
1000 խոշոր հարկատուների ցանկում ընդգրկված ՏՏ ընկերությունները 2023 թվականի առաջին եռամսյակում պետբյուջեի համար ապահովել են շուրջ 17.3 մլրդ դրամի եկամուտ կամ ՊԵԿ-ի կողմից վերահսկվող եկամուտների 5%-ը։ Հարկ է նշել, որ ամբողջ 2022թ. ոլորտի վճարած հարկերի հանրագումարը կազմել էր 51 մլրդ դրամ, ու 2023թ. առաջին եռամսյակում արդեն ապահովվել է նախորդ տարվա ցուցանիշի 1/3-ը:
Նախորդ հաշվետու ժամանակահատվածների համեմատ կտրուկ առաջընթաց է գրանցել Veeam Armenia ընկերությունը, որը միայն 2022թ. էր գրասենյակ բացել Հայաստանում: Այս ընկերությունը բյուջե է վճարել 1,7 մլրդ դրամ:
Նման դասակարգմամբ ցանկում չեն ներառվել «Սոֆթ կոնստրակտ» /19/ և «Դիջիթեյն» /44/ ընկերությունները, որոնք Հայաստանում ՏՏ ոլորտի խոշորագույն գործատուներից են: Այս երկու ընկերություններն էլ առաջին եռամսյակում բյուջե են վճարել համապատասխանաբար 2,3 մլրդ և 1,3 մլրդ դրամ հարկ:
Կարդացե՛ք նաև՝
- ՀՀ խոշոր հարկ վճարողների առաջին տասնյակում նոր ընկերություններ կան
- ՏՏ ամենաակտիվ գործատուները Հայաստանում
Միացե՛ք How2B-ի Տելեգրամյան ալիքին՝ ամենահետաքրքիր հոդվածներն ու նորությունները բաց չթողնելու համար:
