Google-ը հայտնել է YouTube-ի համար գեներատիվ արհեստական ինտելեկտի նոր գործառույթների փորձարկման մասին, որոնք կօգնեն մարդկանց ստեղծել երաժշտական ստեղծագործություններ՝ հիմնված տեքստային նկարագրության և խոսափողով երգած պարզ մեղեդիների վրա: Դրանցից մեկն առաջարկում է թրեքների գեներացիա՝ հայտնի արտիստների ոճով և նրանց թույլտվությամբ։
Պլատֆորմի ադմինիստրացիան նորամուծությունները մշակում է հաշվի առնելով AI-ի մասնակցությամբ ստեղծված երաժշտական ստեղծագործությունների հեղինակային իրավունքի նոր կանոնակարգերը:
Նորամուծություններից մեկը կոչվում է Dream Track. այն արդեն փորձարկվում է «Միացյալ Նահանգներից հեղինակների փոքր խմբի» հետ և թույլ է տալիս ստեղծագործություններ ստեղծել ինը հայտնի արվեստագետների ոճով. Alec Benjamin, Charlie Puth, Demi Lovato, John Legend, Papoose, Sia, T-Pain և Troye Sivan։
Պլատֆորմն իր վրա է վերցնում գրեթե ամբողջ աշխատանքը՝ տեքստի, հնչյունագրերի և ձայնային մասերի ստեղծում տվյալ արտիստի ոճով: Ստացված ձայնագրությունները վերբեռնվում են YouTube Shorts բաժին:
YouTube-ը մշակում է նաև այլ AI գործիքներ, որոնք թույլ են տալիս ստեղծել կոմպոզիցիաներ առանց ավանդական ստեղծագործական գործիքների: Օրինակ՝ կարելի է մեղեդի հնչեցնել միկրոֆոնով, այն լրացնել «սաքսոֆոնի սոլո» տեքստային նկարագրությամբ և հետաքրիքր արդյունք ստանալ։
Գործիքներն աշխատում են Google DeepMind-ի «երաժշտության ստեղծման ամենաառաջադեմ մոդելի»՝ Lyria-ի միջոցով: Բոլոր ստեղծված թրեքերը կունենան SynthID ջրանիշ:
Միացե՛ք How2B-ի Տելեգրամյան ալիքին՝ ամենահետաքրքիր հոդվածներն ու նորությունները բաց չթողնելու համար:
