Հայկական New Norm ստարտափը հայտարարել է նոր համագործակցության մասին՝ eqwefy ներդրումային հարթակի հետ։ Այժմ օգտատերերը կարող են ոչ միայն օգտվել New Norm-ի ծառայությունից, այլև ներդրում կատարել ստարտափում։
Ընկերության հիմնադիր Դիանա Օգանեսյանի խոսքով՝ սա կարևոր փուլ է New Norm-ի զարգացման համար, քանի որ նախագիծը սկզբից ի վեր նպատակ է ունեցել ոչ միայն տեխնոլոգիական պրոդուկտ ստեղծել, այլ ձևավորել նոր մշակույթ՝ հոգեկան առողջության պահպանման շուրջ՝ այն դարձնելով առօրյա կյանքի մաս՝ քնի, ֆիզիկական ակտիվության կամ առողջ սննդի նման։
New Norm-ը դիրքավորվում է որպես հոգեկան առողջության ոլորտում նորարար հարթակ, որը փորձում է անցում կատարել դասական՝ փուլային (episodic) թերապիայից դեպի արհեստական բանականությամբ շարունակական աջակցություն։ Պրոդուկտի հիմքում «էմոցիոնալ հիշողության» համակարգը, որը թույլ է տալիս օգտատերերին ստանալ մշտական և անհատականացված աջակցություն՝ ժամանակի ընթացքում հարմարվելով նրանց վարքին և վիճակին։
Հարթակը ներառում է AI-ի հետ շփման հնարավորություն, օրագրային գրառումներ, մտքի վիզուալիզացիայի գործիքներ, նաև կարող է ինտեգրվել մասնագետների հետ՝ կապ ստեղծելով թվային լուծումների և ավանդական թերապիայի միջև։ Այժմ հասանելի է նաև պլատֆորմի հանրային բետա տարբերակը։
New Norm-ը գործող արտադրանք է՝ B2C բաժանորդագրություններով և թերապևտներին ուղղված SaaS-ով, արդեն սպասարկում է հազարավոր օգտատերերի՝ ուժեղ ներգրավվածությամբ և վաղ փուլում վճարովի կոնվերտացիայով։ Ընկերությունն ակտիվ գործընկերություններ է հաստատել կլինիկաների, համալսարանների և էկոհամակարգի դերակատարների հետ, և արդեն սկսում է ստեղծել եկամուտ B2C, B2B և կլինիկական փորձնական ծրագրերի միջոցով։
New Norm-ը eqwefy-ում հասանելի կլինի երկու ամիս։ Eqwefy-ը թույլ է տալիս ներդրումներ կատարել 10 հազար դրամից սկսած։
