Հայկական Garoon Tech ստարտափը հաղթել է Energy Globe Award մրցույթում, որն աշխարհի ամենանշանակալի բնապահպանական մրցանակն է համարվում:
Այս տարի մրցույթին մասնակցել է աշխարհի շուրջ 180 երկրներից ավելի քան 2500 ծրագիր՝ ուղղված շրջակա միջավայրի պաշտպանությանը։
«Garoon Tech-ը իսկապես դժվար ժամանակներ է ապրում հետխորհրդային տարածաշրջանում շարունակվող ճգնաժամի պատճառով: Այս տարածաշրջանը նախատեսված էր լինել մեր արտադրանքի սկզբնական թիրախային շուկան: Շատ վերափոխումներ ենք նախատեսում իրականացնել մեր ընկերության ներսում՝ տվյալահեն գյուղատնտեսությանը վերածնունդ հաղորդելու նպատակով, սակայն կայունությունն ու մեր սկզբնական նպատակները միանշանակ են և ենթակա չեն փոփոխման: Եվս մեկ անգամ շնորհակալ ենք մեզ հավատալու համար», — ասվում է Garoon Tech-ի տարածած հայտարարության մեջ։
Garoon Tech-ը խելացի գյուղատնտեսական համակարգ է, որը թույլ է տալիս խելացի գյուղատնտեսություն վարել՝ մշտադիտարկել և վերահսկել հողամշակման տարբեր փուլեր և տեղեկանալ կարևոր պարամետրերի մասին բջջային հավելվածի միջոցով: Ստարտափի առաքելությունն է փոխակերպել ավանդական՝ ինտուիցիայի վրա հիմնված գյուղատնտեսությունը ճշգրիտ, տվյալահեն գյուղատնտեսության:
Տեխնոլոգիական և բիզնես ոլորտի նորությունները՝ մեր Ֆեյսբուքյան էջում։
