Ալեքսանդր Բադալյանի հիմնադրած Emerald ստարտափը ներգրավել է 2 միլիոն դոլարի pre-seed ներդրում՝ առողջապահական կանխարգելիչ հարթակի զարգացման համար։ Ներդրումը գլխավորել է Boost Capital Partners-ը՝ մի շարք հրեշտակ ներդրողների մասնակցությամբ։ Ներդրումային փուլին մասնակցել է նաև հայկական Granatus Ventures-ը։
2024 թվականին հիմնադրված Emerald-ը մշակում է համապարփակ առողջապահական հարթակ, որը միավորում է առողջական տվյալները, արհեստական բանականության վրա հիմնված վերլուծությունը և ընտանեկան բժշկի մասնակցությամբ բուժօգնությունը։ Ստարտափի նպատակն է առողջապահական համակարգը տեղափոխել ռեակտիվ բուժումից դեպի կանխարգելիչ մոտեցում։
Ընկերության տվյալներով՝ բետա փուլի ընդլայնումից հետո վեց ամսում օգտատերերի թիվը եռապատկվել է, մշակվել է ավելի քան 25 հազար թեստ, իսկ օգտատերերի գոհունակության ցուցանիշը (NPS) կազմել է 80։
Ստարտափի եկամուտները ձևավորվում են անհատական բաժանորդագրություններից և B2B գործընկերություններից առողջապահական կազմակերպությունների հետ։
Ընկերությունը նաև ստացել է Մեծ Բրիտանիայի առողջապահական կարգավորող մարմնի՝ CQC-ի լիարժեք գրանցում, ինչը կարևոր քայլ է կլինիկական վավերացման և մասշտաբավորման համար։ Emerald-ը արդեն ունի նախնական ներգրավվածություն և հաստատված կլինիկական արդյունքներ։
