Մայիսի 5-ից «ԱրարատԲանկ» ԲԲԸ-ի վարչության նախագահի և գործադիր տնօրենի պաշտոնը ստանձնել է Վախթանգ Աբրահամյանը։ Նա ունի շուրջ 30 տարվա ղեկավարման փորձ բանկային և ֆինանսական համակարգում, այդ թվում՝ ՀՀ Կենտրոնական բանկում:
Բանկի հաղորդագրության համաձայն՝ նոր ղեկավարի նշանակմամբ կմեկնարկի զարգացման նոր փուլ, որը կներառի թվային վերափոխում, կառավարման և բիզնես մոդելների արդիականացում։
Վախթանգ Աբրահամյանն այս պաշտոնում փոխարինել է Մհեր Անանյանին, որը ղեկավարում էր բանկը վերջին վեց տարիներին։ ԱրարատԲանկի խորհուրդը շնորհակալություն է հայտնել նախկին գործադիր տնօրենին՝ բարդ ժամանակահատվածում հաստատության գործառնական կայունությունն ապահովելու և արդյունավետ ղեկավարման համար։
ԱրարատԲանկը վերահսկվում է ՀՀ կենտրոնական բանկի կողմից։
