OpenAI-ը նախատեսում է փակել իր վիդեոգեներացիայի ծառայությունը՝ Sora-ն, ինչպես նաև խզել շուրջ 1 միլիարդ դոլար արժողությամբ գործարքը The Walt Disney Company-ի հետ, հայտնում են միջազգային լրատվամիջոցները։
Sora-ի թիմը այս մասին հայտնել է X հարթակում՝ չբացահայտելով փակման պատճառները։ Նրանք նշել են, որ ավելի ուշ կներկայացնեն թե՛ փակման ժամկետները, թե՛ այն, թե ինչպես օգտատերերը կարող են պահպանել իրենց ստեղծած վիդեոները։
Ըստ Cnet-ի՝ ընկերությունը որոշել է կենտրոնանալ ռոբոտաշինության համար «աշխարհի սիմուլյացիայի» հետազոտությունների վրա։ Միևնույն ժամանակ, Reuters-ի աղբյուրների համաձայն, Sora-ի աշխատակիցները նախապես չեն տեղեկացվել այս որոշման մասին և այն համարել են անակնկալ։
Ինչպես գրում է The Wall Street Journal-ը, այս քայլը կապված է OpenAI-ի բիզնես ռազմավարության փոփոխության հետ․ ընկերությունը կենտրոնանում է ծրագրավորման գործիքների զարգացման վրա՝ սպասվող IPO-ից առաջ։ Նշվում է նաև, որ ChatGPT-ում կարող են դադարեցվել վիդեոգեներացիայի հնարավորությունները։
Բացի այդ, Financial Times-ի տվյալներով, կխզվի նաև The Walt Disney Company-ի հետ գործարքը, որի շրջանակում Sora-ում պետք է հայտնվեին Disney, Marvel, Pixar և «Star Wars» ֆրանշիզաների կերպարները։
Լրատվամիջոցների գնահատմամբ՝ Sora-ն բախվել է ցածր պահանջարկի և բարդ տնտեսական պայմանների հետ։
Հիշեցնենք, որ Sora-ն ներկայացվել էր 2024 թվականի փետրվարին, իսկ 2025-ի սեպտեմբերին թողարկվել էր Sora 2 տարբերակը և iOS հավելվածը։ Սկզբում հասանելիությունը տրամադրվում էր միայն հրավերով, սակայն հետագայում սահմանափակումները հանվել էին։
