Staff.am-ի «Compass» վերլուծական ուղղության կողմից հրապարակված «ՀՀ Աշխատաշուկա 2025» համապարփակ զեկույցը հետաքրքիր բացահայտումներ է անում հայաստանյան աշխատաշուկայի ներկայիս վիճակի վերաբերյալ: Ի տարբերություն նախորդ տարիների կտրուկ տատանումների՝ 2025 թվականին շուկան դարձել է ավելի կանխատեսելի՝ արձագանքելով իրական գործառնական պահանջներին:
Որո՞նք են աշխատաշուկայի ամենաակտիվ ոլորտները
2025 թվականի տվյալներով աշխատաշուկան դարձել է ավելի դիվերսիֆիկացված: Թեև ֆինանսաբանկային և ապահովագրական ոլորտը շարունակում է պահպանել առաջատարի դիրքը՝ տալով աշխատանքի բոլոր հայտարարությունների 20.8%-ը, տեղեկատվական տեխնոլոգիաների (ՏՏ) ոլորտը ցուցաբերել է վերականգնման զգալի նշաններ:
Աշխատաշուկայի հնգյակն ըստ հավաքագրման ծավալների ունի հետևյալ պատկերը.
- Ֆինանսաբանկային և ապահովագրություն — 20.8%
- Տեղեկատվական տեխնոլոգիաներ — 20.2%
- Ծառայություններ — 9.9%
- Արտահանում, ներմուծում և առևտուր — 9.7%
- Արտադրություն և արդյունաբերություն — 9.2%
Ոչ-ՏՏ մասնագիտությունների կշիռն աստիճանաբար աճում է:
Ամենաակտիվ գործատուները
2025 թվականին հավաքագրման ծավալներով առաջատար եռյակում տեղի են ունեցել հետաքրքիր փոփոխություններ: SoftConstruct ընկերությունը շարունակում է գլխավորել ամենաակտիվ գործատուների ցանկը: Երկրորդ հորիզոնական է բարձրացել Ֆասթ բանկը՝ շրջանցելով Digitain-ին:
Բանկային համակարգի բարձր ակտիվությունը հաստատվում է նաև Ամերիաբանկի, Ակբա բանկի և Ինեկոբանկի համալրման ծավալների էական աճով: Մարզերում ամենաակտիվ գործատուների թվում են նաև հեռահաղորդակցության խոշոր օպերատորները՝ Տելեկոմ Արմենիան, Յուքոմը և Վիվան, ինչպես նաև արտադրության ոլորտից՝ Բեկոն Պրոդուկտը:
Պահանջվող մասնագիտական գիտելիքներ և տեխնոլոգիաներ
Աշխատաշուկայի պահանջարկը 2025-ին որակական նոր փուլ է մտել, որտեղ մասնագիտական գիտելիքների կողքին կարևորվում է նաև այլ գործիքների տիրապետումը.
- ՏՏ ոլորտ: Ամենապահանջված տեխնոլոգիան շարունակում է մնալ JavaScript-ը և դրա Framework-ները: Սակայն 2025-ի կարևորագույն միտումը Արհեստական Բանականության (ԱԲ) գործնական կիրառումն է: Առաջացել են նոր հաստիքներ, ինչպիսիք են Agentic AI Engineer, AI Artist և AI Designer: Գործատուներն ավելի հաճախ են պահանջում LangChain, OpenAI API և Prompt Engineering հմտություններ:
- Ֆինանսական ոլորտ: Բացի բանկային գործի իմացությունից, առանցքային է MS Excel-ի խորացված տիրապետումը, ինչպես նաև ArmSoft և LSoft ծրագրային ապահովումների իմացությունը:
- Առևտուր և Արտադրություն: Այս ոլորտներում գերիշխող է վաճառքի և սպասարկման կազմակերպման հմտությունը՝ պայմանավորված սպասարկման ցանցերի ընդլայնմամբ և կադրերի բարձր հոսունությամբ:
Փափուկ հմտությունների դերը
Զեկույցը փաստում է, որ գործատուները հավասարապես կարևորում են թե՛ կոշտ՝ նեղ մասնագիտական, թե՛ փափուկ հմտությունները։
Ամենապահանջված 5 փափուկ հմտություններն են.
- ժամանակի կառավարում — Պահանջվում է հայտարարությունների 7.1%-ում
- թիմում աշխատելու ունակություն — 6.0%
- մանրուքների նկատմամբ ուշադրություն — 5.5%
- խնդիրների լուծում — 5.3%
- բանակցային հմտություններ — 5.3%
2026 թվականի համար կանխատեսվում է ՏՏ ոլորտի աճի վերականգնում և աշխատաշուկայի որակական վերափոխում՝ պայմանավորված արհեստական բանականության գործնական կիրառմամբ ու նոր հմտությունների պահանջարկով: Տնտեսության աստիճանական դիվերսիֆիկացմանը զուգահեռ կպահպանվի աշխատավարձերի չափավոր աճը, իսկ Երևանը կշարունակի պահպանել իր դիրքը որպես երկրում հիմնական աշխատաշուկայի կենտրոն:
