ՀՀ Վիճակագրական կոմիտեն ներկայացրել է 2025 թվականի հունվար-հոկտեմբեր ամիսների Հայաստանի սոցիալ-տնտեսական վիճակը բնութագրող հիմնական մակրոտնտեսական ցուցանիշները՝ նախորդ տարվա նույն ժամանակահատվածի համեմատ։
Ընդհանուր տնտեսական ակտիվության ցուցանիշը (ՏԱՑ) նշված ժամանակահատվածում աճել է 8.1%-ով։ Ամենաբարձր աճը գրանցվել է շինարարության ոլորտում՝ կազմելով 20.6%։ Ծառայությունների ծավալը, առանց առևտրի հատվածի, աճել է 10.8%-ով, իսկ առևտրի շրջանառությունը աճել է 3.2%-ով։ Էլեկտրաէներգիայի արտադրության ցուցանիշն աճել է 4.2%-ով, իսկ սպառողական գների ինդեքսը՝ 3.3%-ով։
Չնայած տնտեսական ակտիվության ընդհանուր աճին, արձանագրվել է նվազում արտադրական և արտաքին առևտրային հատվածներում։ Մասնավորապես, արդյունաբերական արտադրանքի ծավալը նվազել է 3%-ով։ Արտաքին առևտրում ևս նկատվել է զգալի անկում. արտահանման ծավալները նվազել են 44.7%-ով, իսկ ներմուծման ծավալները՝ 31.2%-ով՝ նախորդ տարվա նույն ժամանակաշրջանի համեմատ։
Առանձին դիտարկմամբ, միայն 2025 թվականի հոկտեմբեր ամսվա ցուցանիշները նախորդ տարվա հոկտեմբերի նկատմամբ ցույց են տալիս ՏԱՑ-ի էլ ավելի բարձր աճ՝ կազմելով 10.1%։ Հոկտեմբերին արդյունաբերական արտադրանքի ծավալը, ի տարբերություն տասնամսյակի, գրանցել է աճ՝ 10.1%-ով, իսկ շինարարության աճը կազմել է 20.1%։ Ծառայությունների ծավալն աճել է 12.8%-ով, իսկ էլեկտրաէներգիայի արտադրության ցուցանիշը՝ 17.9%-ով։
Հոկտեմբեր ամսվա կտրվածքով արտաքին առևտրում նվազման տեմպերը դանդաղել են, սակայն շարունակում են մնալ բացասական. արտահանումը նվազել է 21.8%-ով, իսկ ներմուծումը՝ 11.9%-ով։ Սպառողական գների ինդեքսի աճը հոկտեմբերին կազմել է 3.7%։
