Հայկ Տեփանյանի և Հրանտ Ղարիբյանի հիմնադրած BlueQubit ընկերությունը 10 մլն դոլար սաղմնային փուլի ներդրում է ներգրավել։
Ներդրումային փուլը գլխավորել է Nyca Partners-ը, մասնակցել են հայ ներդրողներ՝ BigStory VC-ն, Untapped Ventures-ը, Formula VC-ն, Granatus Ventures-ը, ինչպես նաև այլ հայտնի համաշխարհային ներդրողներ։
Այս ֆինանսավորումը կօգնի BlueQubit-ին ընդլայնել իր հարթակը այնպիսի ոլորտների վրա, ինչպիսիք են ֆինանսները, դեղագործությունը և նյութագիտությունը։ Սրանք ոլորտներ են, որոնք կարիք ունեն քվանտային ներուժի՝ լուծելու համար անլուծելի խնդիրները:
Կալիֆորնիայում գործող BlueQubit քվանտային հաշվողական ընկերությունը մասնագիտացած է քվանտային ծրագրային սիմուլյացիաների մեջ:
BlueQubit-ի Quantum Software as a Service (QSaaS) հարթակը նպատակ ունի հեշտացնել քվանտային հաշվարկների ինտեգրումը իրական աշխարհում՝ տրամադրելով քվանտային պրոցեսորային միավորների (QPUs) և քվանտային էմուլյատորների հասանելիություն։
Ըստ հիմնադիրների, այս լուծումը կարող է օգնել ֆինանսական, դեղագործական և նյութագիտության ոլորտներին հաղթահարել դասական հաշվարկների սահմանափակումները։
Nyca Partners-ի ներկայացուցիչ Թոմ Բրաունը նշել է, որ BlueQubit-ը խոստումնալից լուծումներ է առաջարկում, որոնք շուտով կարող են նպաստել ֆինանսական ծառայությունների ոլորտում քվանտային հաշվարկների լայնածավալ կիրառմանը։
BlueQubit-ի այս նախաձեռնությունը ևս մեկ քայլ է դեպի քվանտային տեխնոլոգիաների լայնածավալ կիրառման դարաշրջան, գրում է TechCrunch-ը։
