Աշխարհի ամենաաղմկոտ քաղաքը մոտակա օրերին կլինի ավելի աղմկոտ։ Տեխնոլոգիական համայնքը գրոհում է Լաս Վեգաս քաղաքը, որտեղ հունվարի 9-12-ը կանցկացվի տեխնոլոգիական նորարարությունների ամենամասշտաբային միջոցառումներից մեկը՝ CES 2024-ը (Consumer Electronics Show)։
43 ֆուտբոլային մարզադաշտի մեծությամբ տարածքում կներկայացվեն ավելի քան 4000 ցուցանմուշներ աշխարհի 150 երկրներից և տարածաշրջաններից: Ցուցահանդեսի կենտրոնական թեման, ինչպես և կարելի է գուշակել, կլինի արհեստական ինտելեկտը (AI)։ Սպասվում է, որ նորարարության և բարձր տեխնոլոգիաների ցուցահանդեսին կմասնակցի մինչև 130 հազար այցելու:
«Աշխարհում ոչ մի այլ իրադարձություն չի միավորում ամբողջ տեխնոլոգիական արդյունաբերության էկոհամակարգը, ինչպես CES-ը», – ասում է Գարի Շապիրոն՝ Սպառողական տեխնոլոգիաների ասոցիացիայի (CTA) նախագահն ու գործադիր տնօրենը, CES-ի կազմակերպիչը: Նրա խոսքով, CES-ն այս տարի կենտրոնանում է տեխնոլոգիայի կարևոր դերի վրա՝ մարդկային կյանքի բոլոր ասպեկտների բարելավման գործում: CES 2024-ը կլինի մի վայր, որտեղ բիզնես առաջնորդները կհանդիպեն և կլուծեն խնդիրները:
Այս տարի CES-ում առաջին անգամ AI-ին հատկացվել է հատուկ ցուցահանդեսային տարածք, որտեղ ներկայացված է ոլորտի վերջին զարգացումների ողջ արսենալը՝ գյուղատնտեսությունից մինչև բժշկություն, մեքենաշինությունից մինչև տիեզերագնացություն, NFT, խաղեր և ցանկացած այլ հնարավոր ոլորտ։
Ցուցահանդեսի ընթացքում ամեն օր կլինեն մամուլի ասուլիսներ, որոնք կօգնեն ավելի լավ հասկանալ, թե ինչ է կատարվում և ինչին պետք է ուշադրություն դարձնել։ Կլինեն նաև հաշվետվություններ չիպերի (միկրոսխեմաներ) և միկրոպրոցեսորների էվոլյուցիայի մասին, տվյալների կենտրոնների էվոլյուցիայի և շատ ավելին: Նախատեսվում է նաև քննարկել AI-ի հետ աշխատելու էթիկական ասպեկտները:
Սպառողական տեխնոլոգիաների համաշխարհային գիգանտները, ինչպիսիք են Amazon-ը, Google-ը, Samsung-ը, LG-ն, Mercedes-Benz-ը և բազմաթիվ այլ հայտնի ընկերություններ կներկայացնեն իրենց վերջին նորարարությունները՝ թափանցիկ հեռուստացույց, մենթալ առողջության հայելի, խելացի վզկապ շների համար, արհեստական բանակությամբ բարձ, փոշեկուլ կոշիկներ (որովհետև ինչո՞ւ ոչ :D) և այլ անթիվ անհամար խելացի ու երբեմն նաև զավեշտալի նորություններ։
Ցուցահանդեսին մասնակցում է նաև պատվիրակություն Հայաստանից, սակայն եթե Ձեզ բախտ չի վիճակվել ընդգրկվել դրա կազմում, կարող եք հետևել միջոցառմանը Live ռեժիմով՝ այստեղ։
Իսկ CES 2024-ի ամենահետաքրքիր նորարարություններն ու իրադարձություները բաց չթողնելու համար միացե՛ք How2B-ի Տելեգրամյան ալիքին:
