2024 թվականի առաջին եռամսյակում 1000 խոշոր հարկ վճարողների կողմից պետական բյուջե է վճարվել 387,1 մլրդ ՀՀ դրամ հարկ, որը նախորդ տարվա նույն ժամանակաշրջանի համեմատ աճել է ընդամենը 1,5%-ով, տեղեկանում ենք ՊԵԿ-ի հրապարակած տվյալներից։
1000 խոշոր հարկ վճարողների ցանկի նոր առաջատարը «Մոբայլ Սենթր Արթ» ընկերությունն է՝ 19,9 մլրդ ՀՀ դրամ ընդհանուր վճարված հարկերի չափով։ Ընկերությունը նախորդ տարվա նույն ժամանակաշրջանի համեմատ դիրքերը բարելավել է 6 կետով՝ 3,8 անգամ մեծացնելով վճարված հարկերի չափը։
Հաջորդում է «Գազպրոմ Արմենիան», որը զիջել է առաջատարի իր դիրքը, միևնույն ժամանակ նվազեցնելով վճարված հարկերը շուրջ 15%-ով։
Զանգեզուրի պղնձամոլիբդենային կոմբինատը, գրեթե պահպանելով նախորդ տարվա նույն ժամանակահատվածում վճարած հարկերի չափը (15,6 մլրդ ՀՀ դրամ), այս տարվա առաջին եռամսյակում 3-րդն է։
Վճարած հարկերի չափը ավելացնելով ավելի քան 9%-ով՝ «Գրանդ Տոբակո»-ն զբաղեցրել է ցանկում 4-րդ հորիզոնականը։
Առաջին հնգյակը եզրափակել է «Փրիթի Ուեյը» ընկերությունը՝ 8,8 մլրդ ՀՀ դրամ վճարած հարկերով, որը նախորդ տարվա նույն ժամանակահատվածի ցուցանիշը շատ քիչ է գերազանցել։
Ցանկում հաջորդել են «Սի Փի Էս Էներջի Գրուպ»-ը (4,8 մլրդ ՀՀ դրամ), «Ինտերնեյշնլ Մասիս Տաբակ»-ը (4,7 մլրդ ՀՀ դրամ), «Վիվա Արմենիա»-ն (4,6 մլրդ ՀՀ դրամ), «Սիթի»-ն (4,3 մլրդ ՀՀ դրամ)։
Խոշոր հարկ վճարողների տասնյակը եզրափակում է Վայդբերիզը, որը բարելավել է իր դիրքը ցանկում 10 կետով՝ գրեթե կրկնապատկելով վճարած հարկերի չափը (4,2 մլրդ ՀՀ դրամ)։
Վճարված հարկերից հարկային մարմին կատարված վճարումների գումարը կազմել է ավելի քան 329 միլիարդ 864 միլիոն դրամ, իսկ մաքսային մարմին կատարված վճարումների գումարը՝ ավելի քան 57 միլիարդ 244 միլիոն դրամ։
Կարդացեք նաև՝
- Էլեկտրոնիկի արկածները. Ինչի՞ հաշվին են ավելացել էլեկտրոնիկայի վաճառքով զբաղվող ընկերությունների հարկերը
- 2023թ. խոշոր հարկատուները. նոր ընկերություններ տասնյակում, առաջատարը նույնն է
Միացե՛ք How2B-ի Տելեգրամյան ալիքին՝ ամենահետաքրքիր հոդվածներն ու նորությունները բաց չթողնելու համար:
