Ֆինլանդիան արդեն 8-րդ տարին անընդմեջ ճանաչվել է աշխարհի ամենաերջանիկ երկիրը՝ պահպանելով առաջին հորիզոնականը World Happiness Report 2025 զեկույցում։
Երջանկության ցուցանիշները հաշվարկվում են վերջին երեք տարիների կյանքի ընդհանուր գնահատականների միջինով՝ հաշվի առնելով վեց հիմնական գործոն՝ ՀՆԱ-ն մեկ շնչի հաշվով, սոցիալական աջակցությունը, առողջ կյանքի տևողությունը, ազատությունը, բարեգործությունը և կոռուպցիայի ընկալումը։ Այս մեթոդաբանությունը թույլ է տալիս գնահատել ոչ միայն նյութական բարեկեցությունը, այլև մարդկանց սուբյեկտիվ գոհունակությունը։
Սկանդինավյան երկրները շարունակում են գերակշռել ցուցակում. Ֆինլանդիային հաջորդում են Դանիան, Իսլանդիան, Շվեդիան և Նիդեռլանդները։ Թոփ 10-յակում են նաև Կոստա Ռիկան, Նորվեգիան, Իսրայելը, Լյուքսեմբուրգը և Մեքսիկան։
Հայաստանը 2025-ին զբաղեցնում է 87-րդ հորիզոնականը։ Նախորդ տարիներին մեր երկրի դիրքը հետևյալն է եղել․ 2021-ին՝ 88, 2022-ին՝ 81, 2023-ին՝ 83, 2024-ին՝ 82։ Այսինքն՝ վերջին երեք տարիներին Հայաստանը պահպանել է միջին վարկանիշ՝ առանց էական փոփոխությունների։ Հայաստանի և Վրաստանի ցուցանիշները հատկապես ցածր են կյանքի որակի գնահատման և սոցիալական աջակցության բաղադրիչներով, մինչդեռ Ադրբեջանը բավական հետ է նաև կոռուպցիայի վերահսկման ցուցանիշով։
Վերջին հորիզոնականում կրկին Աֆղանստանն է, նրան հաջորդում են Սիեռա Լեոնեն, Լիբանանը, Մալավին ու Զիմբաբվեն։
- Ֆինլանդիա
- Դանիա
- Իսլանդիա
- Շվեդիա
- Նիդեռլանդներ
- Կոստա Ռիկա
- Նորվեգիա
- Իսրայել
- Լյուքսեմբուրգ
- Մեքսիկա
…
87. Հայաստան
91. Վրաստան
106. Ադրբեջան
