Չորս տարի առաջ ֆրանսիական Avenir Telecom-ը, որն ունի Energizer ապրանքանիշի օգտագործման լիցենզիա, MWC ամենամյա ցուցահանդեսին ներկայացրել էր 18000 mAh մարտկոցով սմարթֆոն։ Այդ ժամանակից ի վեր ընկերության ինժեներները պարապ չեն մնացել, և արդեն MWC 2024-ին մշակողը լայն հանրությանը ցուցադրել է Hard Case P28K սմարթֆոնը, որի հիմնական առանձնահատկությունը 28000 mAh մարտկոցն է։
Նախորդ մոդելի նման, Hard Case P28K-ը կվաճառվի Energizer ապրանքանիշով։ Այսպիսով, Energizer Hard Case P28K-ը ստացել է զանգվածային արտադրության սմարթֆոնի վրա երբևէ տեղադրված ամենատարողունակ մարտկոցը։ Ըստ մշակողների՝ մարտկոցի մեկ լիցքավորումը բավական է մեկ շաբաթվա ընթացքում սարքի ինքնավար շահագործումն ապահովելու համար։ Զրույցի ռեժիմում սմարթֆոնը կարող է աշխատել առանց վերալիցքավորման մինչև 122 ժամ (ավելի քան 5 օր), իսկ սպասման ռեժիմում ինքնավարությունը մեծանում է մինչև 2252 ժամ (գրեթե 94 օր): Մարտկոցն ապահովում է արագ լիցքավորում մինչև 33 Վտ:
Սարքն, այնուամենայնիվ, ունի նաև թերություններ՝ նրա ոչ տպավորիչ ապարատային բնութագրերը, ինչպես նաև դրա չափն ու քաշը: Դրա հաստությունը 27,8 մմ է, իսկ քաշը՝ 570 գ, ինչը երեք անգամ գերազանցում է iPhone 15-ի հաստությունն ու քաշը: Այսպիսով, այն մարդկանց համար, ովքեր փնտրում են էլեգանտ սարք, նոր արտադրանքը միանշանակ հարմար չէ:
Ինչ վերաբերում է այլ պարամետրերին, դրանում բացակայում է հինգերորդ սերնդի կապի ցանցերի (5G) աջակցությունը: Այն հագեցած է MediaTek MT6789 միկրոպրոցեսորով, որը լրացվում է 8 ԳԲ օպերատիվ հիշողությամբ և 256 ԳԲ սկավառակով: Սարքն ունի 6,78 դյույմանոց LCD էկրան՝ 1080p լուծաչափով և եռակի հիմնական տեսախցիկով: Որպես ծրագրային հարթակ օգտագործվում է Google Android 14-ը։
Avenir Telecom-ը նախատեսում է Energizer Hard Case P28K-ը վաճառել 250 դոլարով: Սմարթֆոնը վաճառքում կհայտնվի այս տարվա հոկտեմբերին։
Բիզնես և տեխնոլոգիական ոլորտի նորությունները բաց չթողնելու համար միացե՛ք How2B-ի Տելեգրամյան ալիքին։
