Իլոն Մասկը կարող է դառնալ պատմության մեջ առաջին տրիլիոնատերը, եթե նրա հիմնադրած SpaceX ընկերության բորսայական տեղաբաշխումը հաջողությամբ իրականացվի։
Ընկերությունը պատրաստվում է IPO-ի, որը կարող է դառնալ Ուոլ Սթրիթի պատմության ամենախոշորներից մեկը։ SpaceX-ի գնահատականը կարող է հասնել մոտ 1.5 տրիլիոն դոլարի, ինչը գրեթե կրկնակի բարձր է նախորդ տարվա ցուցանիշներից։
Տեղաբաշխման ընթացքում նախատեսվում է ներգրավել մինչև 75 միլիարդ դոլար ներդրում։ Այս միջոցները կուղղվեն Մասկի լայնածավալ նախագծերին՝ ներառյալ Լուսնային բազայի կառուցումը, Մարսի առաքելությունները և տիեզերքում տվյալների խոշոր կենտրոնների ստեղծումը։
Վերջին զարգացումներով՝ SpaceX-ը ձևավորվում է որպես բազմաոլորտ տեխնոլոգիական հարթակ՝ միավորելով հրթիռային բիզնեսը, Starlink արբանյակային ինտերնետ ցանցը և xAI արհեստական բանականության ստարտափը։
Եթե Մասկը պահպանի իր մոտ 42% բաժնեմասը, ապա IPO-ից հետո նրա կարողությունը կարող է գերազանցել 1 տրիլիոն դոլարը։ Ըստ հրապարակումների՝ ընկերության բորսա դուրս գալը կարող է տեղի ունենալ արդեն 2026 թվականի կեսերին։
