Meta ընկերության գործադիր տնօրեն Մարկ Ցուկերբերգը ներկայացրել է վիրտուալ իրականության իր նոր ակնոցը՝ Quest Pro-ն։ Ընկերության ղեկավարն այն ներկայացրել է ծրագրավորողների համար անցկացված առցանց միջոցառման ժամանակ։
Սարքն արժե 1,499 ԱՄՆ դոլար և գրեթե չորս անգամ գերազանցում է Meta-ի ներկայիս ակնոցի՝ Quest 2-ի գինը, որն սկսվում է $399-ից:
Quest Pro-ն ունի նաև կատարելագործված հպման կարգավորիչներ և ավելի բարակ ոսպնյակներ, կոր մարտկոցը հետևի մասում է՝ գլխին ամրացվող ժապավենի վրա:
Ի տարբերություն իր նախորդի՝ նոր ակնոցը օգտատերերին թույլ է տալիս էկրանից դուրս տեսնել նաև իրական միջավայրը, այսինքն՝ սարքն ունի խառը իրականության հնարավորություն։ Մարկ Ցուկերբերգն ասել է, որ խառը իրականությունը «հաջորդ կարևոր քայլն է վիրտուալ իրականության համար»:
Microsoft-ի գործադիր տնօրեն Սաթյա Նադելան նույնպես միացել է օնլայն միջոցառմանը՝ խոսելով համագործակցության մասին: Նա ասել է, որ Quest Pro-ում հասանելի կլինի Windows 365 գրասենյակային պլատֆորմը, քանի որ Meta-ն փորձում է խառը և վիրտուալ իրականությունը դիրքավորել որպես աշխատանքային գործիք, ինչպես նաև որպես զվարճանքի ձև:
Առանց վերալիցքավորման Quest Pro-ն կարող է աշխատել մինչև երկու ժամ: Meta-ի նոր սարքի մատակարարումները կսկսվեն հոկտեմբերի 25-ից:
Տեխնոլոգիական և բիզնես ոլորտի այլ նորությունների ծանոթացե՛ք՝ միանալով մեր Տելեգրամյան ալիքին։
