ՀՀ էկոնոմիկայի նախարար Վահան Քերոբյանը Buy Armenian հարթակի 2-րդ ֆորումում հայտարարել է, որ Հայաստանում կստեղծվի Փոքր և միջին բիզնեսի զարգացման բանկ։
Ըստ նախարարի՝ ՓՄՁ զարգացման բանկի ստեղծումը կօգնի բիզնեսին սկզբնական փուլում՝ ամենախոցելի շրջանում, որից հետո ավելի հեշտ կլինի զարգանալ։ Մասնավորապես՝ զարգացման բանկում լավ գաղափար ունեցող փոքր բիզնեսը կանցնի վերապատրաստման փուլ՝ մենթորների, քոուչների ներգրավմամբ, որից հետո կկազմվի բիզնես պլան, որը կուղարկվի բանկերին՝ մասնակի ֆինանսավորման, մնացած միջոցները կտրամադրի ՓՄՁ զարգացման բանկը: Նախարարը հույս է հայտնել, որ կառավարությունն առաջիկայում կընդունի այս նախագիծը։
Նախարարի խոսքով՝ Եվրոպայում 40 փոքր ձեռնարկություններից աճում է մեկը, իսկ Հայաստանում 500 միկրոձեռնարկություններից աճում է 1 ձեռնարկություն։
Հայաստանի էկոնոմիկայի նախարարության տվյալներով՝ ՓՄՁ-ների տեսակարար կշիռը Հայաստանի ՀՆԱ-ում կազմում է մոտ 27%: Գործակալությունը նախատեսում է առաջիկա 5 տարիների ընթացքում այդ ցուցանիշը հասցնել 50%-ի։