Քրաուդֆանդինգ․ Ինչպե՞ս հազարավոր անծանոթներ կարող են ֆինանսավորել ձեր երազանքը

Վերջին լուրերը

Ունե՞ք հետաքրքիր գաղափար, բայց ոչ բավարար ֆինանսական միջոցներ։ Պատկերացրեք, որ կարող եք ձեր երազանքի նախագիծը իրականություն դարձնել՝ առանց բանկի դռներն ընկնելու: Անհավանակա՞ն է հնչում, ուրեմն շարունակեք կարդալ և բացահայտել քրաուդֆանդինգի անսահման հնարավորությունները:

Քրաուդֆանդինգ․ ինչպե՞ս է այն փոխում խաղի կանոնները

Պատկերացրեք մի աշխարհ, որտեղ ձեր գաղափարի իրականացման համար պարտադիր չէ ունենալ հարուստ բարեկամ կամ համոզել բանկին: Քրաուդֆանդինգը հենց այդպիսի աշխարհ է ստեղծում: Այն վերացնում է ավանդական ֆինանսավորման արգելքները՝ թույլ տալով յուրաքանչյուրին, ով ունի լավ գաղափար, ուղղակիորեն կապվել հազարավոր պոտենցիալ աջակիցների հետ: 

- Advertisement -
Քրաուդֆանդինգ․ Ինչպե՞ս հազարավոր անծանոթներ կարող են ֆինանսավորել ձեր երազանքը

Քրաուդֆանդինգը մեծ թվով անձանց կողմից որևէ նախագծի, ընկերության կամ բիզնեսի ընդլայնման համար իրականացվող ֆինանսավորման այլընտրանքային տարատեսակ է, որը սովորաբար իրականացվում է առցանց հարթակների միջոցով: Քրաուդֆանդինգի միջոցով ֆինանսավորումը բազմաթիվ հաջողություններ է գրանցել մի շարք երկրներում, այդ թվում Հայաստանի Հանրապետությունում: 

Ի տարբերություն ֆինանսավորման ավանդական մեթոդների` քրաուդֆանդինգը ունի հետևյալ առավելությունները և բնութագրվում է հետևյալ հատկանիշներով`

  • Հասանելիություն թվային հարթակների առավելություններին, որոնցից ամենակարևորն այն է, որ հնարավորություն է ստեղծվում գաղափարը ներկայացնելու հազարավոր մարդկանց միանգամից,
  • Մատչելիություն, որպես կանոն, միակ ծախսը, որ կարող է առաջանալ, քրաուդֆանդինգ հարթակը տրամադրող ընկերության հարթակի միջնորդավճարն է: Այն հիմնականում տատանվում է 5-10%-ի սահմաններում: Բանկային վարկավորման համեմատ, անխոս, սա բավական գրավիչ տարբերակ է,
  • Ռիսկի նվազեցում և դիվերսիֆիկացիա, քանի որ շատ մարդկանց հաշվին ֆինանսավորված ծրագրի դեպքում, երբ յուրաքանչյուրի կողմից փոքր միջոցներ են ներդրվում, չվերադարձման հարցն ըստ էության երկրորդ պլան է մղվում:

Որո՞նք են հիմնական տեսակները

Քրաուդֆանդինգն ունի հետևյալ հիմնական տեսակները`

  • Peer to peer (P2P) lending՝ այս դեպքում տրամադրված գումարը վերարդարձվում է ներդրողին՝ տոկոսների հետ միասին:
  • Equity crowdfunding, որի դեպքում ներդրողը ձեռք է բերում ընկերության արժեթղթեր, այդ իսկ պատճառով էլ այս տարբերակը համարվում է կապիտալի շուկայի մի մասը,
  • Rewards-based crowdfunding՝ անհատները նվիրատվություն են կատարում հօգուտ նախագծի կամ բիզնեսի՝ դրա դիմաց ակնկալելով ոչ ֆինանսական փոխհատուցում (ապրանքների կամ ծառայությունների տեսքով)։
  • Donation-based crowdfunding (նվիրաբերումների վրա հիմնված), երբ մեծ թվով անհատներ նվիրատվություն են կատարում հօգուտ որևէ նախագծի կամ բիզնեսի, առանց որևէ ակնկալիքի։
  • Հիբրիդային քրաուդֆանդինգներ՝ նշանակում է, որ ներառված է քրաուդֆանդինգի մեկից ավելի տեսակ։

Հայկական ստարտափներ, որոնք թռիչք են կատարել քրաուդֆանդինգի շնորհիվ

Հայկական ստարտափները քրաուդֆանդինգի միջոցով մեծ հաջողություններ են գրանցել, հաճախ ներգրավելով զգալի գումարներ իրենց նախագծերի համար:

Volterman խելացի դրամապանակը, որը ներառում է հակագողության, GPS հետևման և Wi-Fi հոթսփոթի հնարավորություններ, Indiegogo հարթակում հավաքել է ավելի քան 2 միլիոն դոլար՝ գերազանցելով իր նախնական նպատակները և ներգրավելով միջազգային ներդրողների ուշադրությունը:

SoloLearn-ը, որը տրամադրում է ծրագրավորման ուսուցման առցանց հարթակ, հավաքել է ավելի քան 1,2 միլիոն դոլար SeedInvest հարթակում, ինչը հնարավորություն է տվել նրան զարգացնել իր կրթական պլատֆորմը և ներգրավել ավելի մեծ թվով ուսանողների ամբողջ աշխարհից:

Joomag-ը, քրաուդֆանդինգի միջոցով հավաքելով ավելի քան 500 000 դոլար, զարգացրել է իր թվային հրատարակչական հարթակը և առաջարկում է բարձրորակ ծառայություններ ամբողջ աշխարհում:

ArmTab Technologies ընկերությունը, որը արտադրում է հայկական պլանշետներ, հավաքել է մոտ 300 000 դոլար՝ ապահովելով իր արտադրանքի զարգացման և միջազգային շուկա դուրս գալու հնարավորությունը:

Armenia Tree Project-ը, որի նպատակն է վերականգնել Հայաստանի անտառները, Kickstarter հարթակում հավաքել է շուրջ 150 000 դոլար՝ ապահովելով իր նախաձեռնությունների իրականացման համար անհրաժեշտ ֆինանսավորումը:

Shadowmatic խաղը հաջողությամբ հավաքել է ավելի քան 100 000 դոլար Kickstarter հարթակում, ինչը հնարավորություն է տվել նրան հասնել համաշխարհային շուկա և շահել բազմաթիվ մրցանակներ:

Քրաուդֆանդինգի միջոցով է մեկնարկել նաև 4u.am հարթակը:

Այս օրինակները ցույց են տալիս, որ քրաուդֆանդինգը կարող է հայ ստարտափներին ապահովել միջազգային ճանաչում և զգալի ֆինանսական աջակցություն:

Որտե՞ղ կարող եք սկսել ձեր արշավը

Քրաուդֆանդինգի աշխարհում կան բազմաթիվ հարթակներ, որոնցից յուրաքանչյուրն ունի իր առանձնահատկությունները: Ձեր արշավը սկսելու համար պետք է ընտրել ձեր նպատակներին համապատասխան հարթակ, ուսումնասիրեք դրա կանոնները և պահանջները, և պատրաստեք համոզիչ ներկայացում ձեր գաղափարի համար:

Միջազգային հարթակներ՝

  1. Kickstarter — լայնածավալ նախագծերի համար
  2. Indiegogo — բազմազան նախագծերի և արտադրանքի նախավաճառքի համար
  3. SeedInvest — ստարտափների համար
  4. GoFundMe — անհատական և սոցիալական նախագծերի համար
  5. Patreon — ստեղծագործողների և բովանդակության ստեղծողների աջակցման համար
  6. Crowdfunder — բիզնես ներդրումների համար
  7. Fundable — բիզնեսների և ձեռնարկատիրական նախագծերի համար
  8. CircleUp — սպառողական արտադրանքի ստարտափների համար
  9. WeFunder — փոքր բիզնեսների և ստարտափների համար
  10. RocketHub — բազմազան նախագծերի և ձեռնարկությունների համար

Հայկական հարթակներ՝

  1. InvestinArmenia — ներդրումային նախագծերի համար
  2. OneArmenia — սոցիալական և կրթական նախագծերի համար
  3. ARFI — ներդրումային քրաուդֆանդինգի հարթակ
  4. The Crowdfunding Formula — բազմազան նախագծերի և ձեռնարկությունների համար

Գաղտնիքներ հաջող արշավի համար

Հաջող քրաուդֆանդինգ արշավը պահանջում է ավելին, քան պարզապես լավ գաղափարը: Նախ, շատ կարևոր է հստակ և ազդեցիկ պատմություն ներկայացնելը, որը կկարողանա գրավել մարդկանց ուշադրությունը և ներգրավել նրանց ձեր արշավին: Ձեր պատմությունը պետք է ունենա հստակ նպատակ, որը կհամապատասխանի ձեր լսարանի արժեքներին և հետաքրքրություններին:

Հաջորդ քայլը վիզուալ նյութերի որակի ապահովումն է, որը ևս կարևոր դեր է խաղում. պրոֆեսիոնալ լուսանկարները, տեսանյութերը և գրաֆիկաները կարող են մեծապես նպաստել ձեր արշավի վստահության և հեղինակության բարձրացմանը: Օգտագործեք սոցիալական մեդիան, ուղիղ հեռարձակումները և հարցուպատասխան սեսիաները՝ ձեր լսարանի հետ անմիջական կապ հաստատելու համար:

Արշավը սկսելուց առաջ ստեղծեք «ներքին շրջանակ»՝ վստահելի աջակիցների խումբ, ովքեր կօգնեն արագ մեկնարկ տալ։ Նախնական փոքր հաջողությունները կարող են հզոր ազդակ լինել: Օրինակ, փոքր գումարների արագ հավաքագրումը կարող է ցուցադրել ձեր արշավի հաջող ընթացքը և վստահություն ներշնչել նոր ներդրողներին:

Ուսումնասիրեք ձեր նպատակային լսարանը և հարմարեցրեք հաղորդագրությունները նրանց նախասիրություններին համապատասխան: Անընդհատ հաղորդակցեք առաջընթացի և թարմացումների մասին, որպեսզի ձեզ աջակցողները զգան, որ նրանք մաս են կազմում ձեր արշավի հաջողությանը:

Ուշադրություն դարձրեք եզակի առաջարկներին և բացառիկ բոնուսներին, որոնք կարող են խրախուսել ավելի ակտիվ մասնակցություն, հատկապես վաղ ներդրողների շրջանում: Մի անտեսեք «վերջին րոպեի հրատապությունը»՝ արշավի վերջում նոր խթաններ առաջարկելով: Այս ամենը միավորելով՝ դուք կարող եք ստեղծել արդյունավետ և հաջողակ քրաուդֆանդինգ արշավ, որը կհասնի իր նպատակներին և նույնիսկ կգերազանցի դրանք:

Ինչի՞ց է պետք զգուշանալ

Քրաուդֆանդինգի ժամանակ կարևոր է ի նկատի ունենալ մի շարք ռիսկեր և մարտահրավերներ:

  • Պետք է պատրաստ լինել, որ արշավը կարող է չհասնել իր ֆինանսական նպատակին, ինչը կարող է հանգեցնել պլանավորված ծրագրերի ձախողմանը:
  • Կա մտավոր սեփականության գողության ռիսկ, հատկապես նորարարական գաղափարների դեպքում:
  • Հանրային ուշադրությունը կարող է երկակի ազդեցություն ունենալ՝ ոգևորելով աջակիցներին, բայց նաև գրավելով քննադատների ուշադրությունը:
  • Արշավի հաջողությունից հետո կարող են առաջանալ լոգիստիկ խնդիրներ, ինչպես օրինակ՝ խոստացված պարգևների ժամանակին առաքումը:
  • Կան իրավական և հարկային բարդություններ, որոնք պետք է հաշվի առնել:
  • Հանրության սպասելիքների կառավարումը կարող է դժվար լինել, հատկապես եթե նախագիծը հետաձգումներ կամ փոփոխություններ է կրում։

Այս ռիսկերի և մարտահրավերների իմացությունը և ճիշտ գնահատումը թույլ կտա ավելի լավ պատրաստվել և կառավարել քրաուդֆանդինգ արշավները:

Ոչ միայն բիզնեսի համար

Քրաուդֆանդինգը վաղուց արդեն դուրս է եկել զուտ բիզնես ոլորտից և ներթափանցել է հասարակական կյանքի տարբեր ոլորտներ: Օրինակ, կրթության ոլորտում այն օգտագործվում է ուսանողների կրթաթոշակների և կրթության որակի բարելավման համար: Արվեստի աշխարհում քրաուդֆանդինգը դարձել է անկախ արվեստագետների և ռեժիսորների ֆինանսավորման կարևոր աղբյուր: Առողջապահության ոլորտում մարդիկ հավաքում են գումարներ թանկարժեք բուժումների և հետազոտությունների համար: Նույնիսկ քաղաքական արշավները և հասարակական շարժումներն են սկսել օգտագործել այս գործիքը: Հետաքրքիր է, որ քրաուդֆանդինգը նաև օգտագործվում է անձնական երազանքների իրականացման համար՝ սկսած հարսանիքների ֆինանսավորումից մինչև արկածային ճամփորդությունների կազմակերպում: Այս բազմազանությունը ցույց է տալիս, որ քրաուդֆանդինգը դարձել է ժամանակակից հասարակության մեջ ռեսուրսների մոբիլիզացման և համայնքային աջակցության հզոր գործիք:

Միացե՛ք How2B-ի Տելեգրամյան ալիքին՝ ամենահետաքրքիր հոդվածներն ու նորությունները բաց չթողնելու համար:

Կարդացե՛ք նաև
Կարդացե՛ք նաև
spot_imgspot_img
Ամենաընթերցվածները