Կարևոր առաջընթաց է արձանագրվել Հայաստանի ձկնարդյունաբերական ոլորտում։ 2025 թվականի մարտի 16-ից Հայաստանը պաշտոնապես ստացել է Եվրոպական Միության երկրներ բարձրորակ ջրային կուլտուրաների՝ թեփուկավոր ձկների և դրանց արտադրանքի (խավիար և ձկնկիթ) արտահանման իրավունք:
Այս հնարավորությունը սահմանվել է նորընդունված Եվրոպական հանձնաժողովի իրականացման կանոնակարգի (ԵՄ) 2025/354-ի համաձայն: Արտահանման համար անհրաժեշտ պայման է հանդիսանում ՀՀ տնտեսավարողների գրանցումը ԵՄ «TRACES» համակարգում:
«Չնայած Հայաստանը չունի ելք դեպի ծով, այդուհանդերձ ձկնաբուծության ոլորտը բավականին զարգացած է, և այն խստորեն վերահսկվում է Սննդի անվտանգության տեսչական մարմնի կողմից։ Վերջինիս հետևողական ջանքերի շնորհիվ, ինչպես նաև Եվրոպական հանձնաժողովի Առողջապահության և սննդի անվտանգության գլխավոր տնօրինության (SANTE) գործընկերների աջակցությամբ է, որ թույլտվության տրամադրման ուղղությամբ մի քանի տարի ընթացքող տեխնիկական գործընթացը հաջողությամբ ավարտվեց։ Այս կարևոր իրադարձությունը նշանակալի քայլ է Հայաստանի տնտեսական բազմազանեցման ուղղությամբ, որը նոր հնարավորություններ կստեղծի աճի և համաշխարհային համագործակցության համար»,- ասվում է հայտարարության մեջ։
