ԱՄՆ կառավարությունը չեղարկել է Anthropic ընկերության Claude Fable 5 և Mythos 5 արհեստական բանականության մոդելների արտահանման սահմանափակումները, որոնք մի քանի շաբաթ առաջ սահմանվել էին ազգային անվտանգության նկատառումներով։
Anthropic-ը հայտարարել է, որ արդեն հուլիսի 2-ից կսկսի վերականգնել մոդելների միջազգային հասանելիությունը՝ ԱՄՆ Առևտրի նախարարությունից ստանալով սահմանափակումների վերացման մասին պաշտոնական ծանուցումը։
Սահմանափակումները կիրառվել էին հունիսի 12-ին, երբ ԱՄՆ իշխանությունները մտահոգություն էին հայտնել, որ այս առաջադեմ AI մոդելները կարող են օգտագործվել հաքերների կողմից՝ համակարգչային համակարգերի վրա կիբերհարձակումներ իրականացնելու նպատակով։
BBC-ի տեղեկություններով՝ ԱՄՆ Առևտրի նախարարությունը հաստատել է, որ Anthropic-ը վերացրել է անվտանգության հետ կապված հիմնական ռիսկերը։ Նախարար Հովարդ Լաթնիկի խոսքով՝ ընկերությունը պարտավորվել է ակտիվորեն բացահայտել և նվազեցնել մոդելների հետ կապված անվտանգության սպառնալիքները, ինչպես նաև համագործակցել կառավարության հետ նոր AI մոդելների թողարկման գործընթացում և տեղեկացնել հնարավոր վնասակար գործունեության մասին։
Միևնույն ժամանակ նախարարությունը նշել է, որ անհրաժեշտության դեպքում պահպանում է արտահանման սահմանափակումները կրկին կիրառելու իրավունքը։
Anthropic-ը նաև շնորհակալություն է հայտնել օգտատերերին՝ ծառայությունների ժամանակավոր սահմանափակումների ընթացքում ցուցաբերած համբերության համար և ընդգծել, որ առաջիկայում կհրապարակի պաշտոնական թարմացումների ցանկը, որտեղ կներկայացվեն կատարված փոփոխություններն ու ընկերության հետագա ծրագրերը։
