Ղազախստանի մայրաքաղաք Աստանայում բացվել է առաջին «Թումո» կենտրոնը։ Այն գործելու է alem.ai արհեստական բանականության միջազգային կենտրոնի բազայի վրա, որը տեղակայված է 80 մետր տրամագծով և 100 մետր բարձրությամբ ապակե գնդաձև շենքում։ Բացման արարողությանը մասնակցել են Ղազախստանի նախագահ Կասիմ-Ժոմարտ Տոկաևը և Ղազախստանում Հայաստանի դեսպան Արմեն Ղևոնդյանը։
Նոր կենտրոնը հնարավորություն ունի շաբաթական ընդունելու մինչև 6000 ուսանողի։ Ուսուցումն անվճար է։ Կրթական ծրագիրը ներառում է հետևյալ ուղղությունները՝ ծրագրավորում, անիմացիա, ֆիլմերի և խաղերի ստեղծում, գրաֆիկական դիզայն, եռաչափ մոդելավորում, ռոբոտաշինություն, երաժշտություն, վեբ մշակում, շարժական գրաֆիկա և գեներատիվ արհեստական բանականություն։
Այս նախագիծը հայկական կրթական մոդելի արտահանման ևս մեկ օրինակ է։ Այն նաև միտված է ամրապնդելու Հայաստանի և Ղազախստանի միջև համագործակցությունը տեխնոլոգիաների և նորարարությունների ոլորտում։
