Հայազգի Երեմ Եղիազարյանի Soley Therapeutics կենսատեխնոլոգիական ընկերությունը հայտարարել է 200 միլիոն դոլարի Series C ներդրումային փուլի հաջող ավարտի մասին։ Սա կարևոր քայլ է հայկական և համաշխարհային բիոտեխնոլոգիական ոլորտում։
Ներգրավված ներդրումը Soley Therapeutics-ին հնարավորություն է տալիս նոր թափ հաղորդել իր գիտահեն և համարձակ գաղափարների իրականացմանը՝ դրանք վերածելով գործնական լուծումների։ Ընկերության նպատակն է արագացնել նորարարական, առաջին կարգի (first-in-class) քաղցկեղի թերապիաների և այլ բարդ հիվանդությունների դեմ դեղամիջոցների մշակումը՝ միաժամանակ վերափոխելով դեղերի հայտնաբերման ավանդական մեթոդաբանությունը։
Soley Therapeutics-ը դեղագործական նորարարական ընկերություն է, որը զբաղվում է նոր դեղերի հայտնաբերմամբ և մշակմամբ։ Ընկերության առանձնահատկությունն այն է, որ դեղերի ազդեցությունը ուսումնասիրում է կենդանի բջիջների վարքագծի միջոցով։
Soley-ը հետևում է, թե ինչպես են բջիջները արձագանքում տարբեր քիմիական միացություններին ժամանակի ընթացքում՝ սթրեսի պայմաններում։ Այս մոտեցումը թույլ է տալիս հասկանալ, ինչպես և ինչու է տվյալ դեղը գործում, ինչ ազդեցություն ունի բջջի վրա և որքան անվտանգ է այն։
Այդ կերպ ընկերությունը կարողանում է հայտնաբերել նոր դեղերի թեկնածուներ, որոնք չեն բացահայտվում ավանդական լաբորատոր փորձարկումների ընթացքում, քանի որ վերջիններս սովորաբար դիտարկում են միայն վերջնական արդյունքը, ոչ թե բջջի ամբողջ ընթացքը։
Ընկերությունը լայնորեն կիրառում է ամբողջական (full-stack) արհեստական բանականություն՝ համագործակցելով Oracle-ի հետ և օգտագործելով OCI AI Infrastructure, NVIDIA AI Enterprise և NVIDIA Blackwell գրաֆիկական պրոցեսորներ։ Կենսաբանության հիմքային գիտելիքների, սեփական պատկերավորման տեխնոլոգիաների, առաջին կարգի ավտոմատացման և ինտեգրված AI գործիքների համադրության շնորհիվ Soley Therapeutics-ը կարճ ժամանակում ձևավորել է բազմազան դեղագործական պորտֆել, որը ներառում է ուռուցքաբանություն, նեյրոդեգեներատիվ խանգարումներ, մետաբոլիկ հիվանդություններ և այլ ոլորտներ։
Soley Therapeutics-ի կենտրոնակայանը գտնվում է Կալիֆոռնիայի Հարավային Սան Ֆրանցիսկոյում։
