Հայաստանի հրեշտակ ներդրողների ակումբը (AICA) իր ներդրումային պորտֆելը համալրել է նոր ընկերությամբ։ Պորտֆելին միացել է Kartes Analytica, Inc. ընկերությունը, որը գործունեություն է ծավալում երկրատարածական հետախուզության և տվյալահեն վերլուծության ոլորտում։
Kartes Analytica-ն զբաղվում է երկրատարածական մեծածավալ տվյալների՝ ներառյալ Երկրի դիտարկման (EO), սինթետիկ ապերտուրային ռադարային (SAR) և ռադիոհաճախականային (RF) տվյալների վերածմամբ փոխկապակցված և վերլուծության համար պատրաստ համակարգերի։ Ընկերության մշակած հարթակը հիմնված է գրաֆային տեխնոլոգիաների վրա և հնարավորություն է տալիս տվյալները ինտեգրել, համակարգել և դրանց հիման վրա ստանալ կիրառելի վերլուծական եզրահանգումներ։
AICA-ն իր գրառման մեջ նշել է, որ ներդրումը նպատակ ունի աջակցելու ընկերության տեխնոլոգիական զարգացմանը և միջազգային ընդլայնմանը։
2022 թվականին հիմնադրված Kartes Analytica-ն երկրատարածական ենթակառուցվածքների և վերլուծական լուծումների ընկերություն է, որը ներկայում ունի գրասենյակներ Հայաստանում և Միացյալ Նահանգներում։
