Հակառակ կանխատեսումներին՝ ԱՄՆ-ում էլեկտրոմոբիլների պահանջարկը նվազել է, և ավտոարդյունաբերության հսկաները սկսում են դադարեցնել կամ հետաձգել իրենց EV նախագծերը՝ շուկայական և քաղաքական ճնշումների պատճառով։
2025 թվականին մի շարք խոշոր ավտոարտադրողներ՝ ներառյալ Honda, Nissan, Volvo, Mercedes-Benz, Stellantis և այլն, հայտարարեցին ԱՄՆ-ում իրենց էլեկտրոմոբիլների նախագծերի սառեցման կամ չեղարկման մասին։ Այս որոշումները պայմանավորված են ԱՄՆ-ի կարգավորիչ քաղաքականության փոփոխություններով, մատակարարման շղթաների խափանումներով և ամենակարևորը՝ սպառողների հետաքրքրության անկմամբ։
Վերջին հինգ տարիների պլանները փլուզվում են
Ավելի վաղ Mercedes-Benz և Volvo ընկերությունները հայտարարել էին, որ մինչև 2030 թվականը ամբողջությամբ անցնելու են էլեկտրական շարժիչների վրա, իսկ General Motors-ը՝ մինչև 2035։ Սակայն համաճարակից հետո եկած տնտեսական անկայունությունը, նոր մաքսային քաղաքականությունը և Հանրապետական կուսակցության նոր օրենսդրական նախաձեռնությունները կասեցրել են այդ ծրագրերը։
AlixPartners խորհրդատվական ընկերության տվյալներով՝ մինչև 2030 թվականի էլեկտրոմոբիլների և հիբրիդների վաճառքի կանխատեսումները նվազեցվել են 46%-ով։ Ընկերության ավտոմոբիլային ուղղության ղեկավար Մարկ Ուեյքֆիլդը նշել է, որ փոխվող մրցակցային միջավայրը, հատկապես Չինաստանի արագ զարգացող ավտոարդյունաբերության ֆոնին, ստիպում է ընկերություններին ավելի արագ վերանայել ռազմավարությունները։
Եթե ԱՄՆ-ում նոր մոդելի մշակումը սովորաբար տևում է 5–7 տարի, ապա չինական ընկերությունները կարողանում են նոր էլեկտրոմոբիլներ բերել շուկա ընդամենը 2 տարում։
Միևնույն ժամանակ, Rhodium Group վերլուծական կենտրոնի էներգետիկ և կլիմայական փորձագետ Հաննա Հեսը ընդգծել է, որ շատ ավտոարտադրողներ այլևս նույնիսկ չեն հայտարարում իրենց էլեկտրոմոբիլային նախագծերի չեղարկման մասին, այլ պարզապես դադարում են խոսել դրանց մասին։ Սա վկայում է ոլորտում տիրող անկայունության և անվստահության մասին՝ ինչպես տեխնոլոգիական, այնպես էլ քաղաքական մակարդակներում։
Չեղարկված նախագծեր
Wired-ի տվյալներով, մի շարք կարևոր էլեկտրոմոբիլային նախագծեր ամբողջությամբ դադարեցվել են՝ հաճախ տարիներ տևած մշակման փուլից հետո։ Դրանց թվում են․
- Ford-ի նախատեսած եռաշարք էլեկտրական ամենագնացը
- Nissan և Infiniti բրենդների էլեկտրական սեդանները
- Mercedes-Benz ընկերության MB.EA-Large էլեկտրական հարթակը (փակվել է 2024թ. մայիսին)
- Maserati MC20 Folgore մոդելի էլեկտրական տարբերակը (չեղարկվել է 2025թ. մարտին)
- Apple Car (Project Titan) նախագիծը, որը դադարեցվել է ընկերության ներսում առաջնահերթությունների փոփոխության պատճառով
- Fisker ստարտափը, որը նախ դադարեցրել է զարգացումները ֆինանսական դժվարությունների պատճառով, այնուհետև հայտարարել սնանկացում
- Volvo-ի ամբողջական էլեկտրական շարքը՝ All-EV, որի զարգացումը կանգնեցվել է դեռևս 2024թ. սեպտեմբերին
Հետաձգված նախագծեր
Որոշ նախագծեր չեղարկվելու փոխարեն պարզապես ժամանակավորապես հետաձգվել են՝ պայմանավորված շուկայում պահանջարկի նվազմամբ կամ տեխնիկական ու ֆինանսական խոչընդոտներով․
- Porsche 718-ի էլեկտրական տարբերակի արտադրությունը հետաձգվել է
- Ferrari-ն իր երկրորդ էլեկտրոմոբիլի թողարկումը տեղափոխել է 2028 թվական
- Lamborghini-ն նախատեսում է իր առաջին էլեկտրական մոդելները թողարկել 2029-ից ոչ շուտ՝ մինչև 2035
- Buick և General Motors (GM) բրենդները հետաձգել են առաջին էլեկտրական մոդելների թողարկումը և վերանայել են մինչև 2035թ. ամբողջական անցման ռազմավարությունը
- Honda-ն հրաժարվել է 2026 թվականին նախատեսված նոր էլեկտրոմոբիլային շարքի արտադրությունից
Չնայած էլեկտրոմոբիլների դարաշրջանը թվում էր անխուսափելի, իրականությունը վկայում է այն մասին, որ անցումը լինելու է ավելի դանդաղ և անորոշ, քան կանխատեսվում էր։
