Հայաստանում և Կալիֆորնիայում գործող SmartGateVC վենչուրային հիմնադրամը ներդրում է կատարել Ritual Dental ատամնաբուժական կլինիկաների ցանցում, որը հեղափոխական մոտեցում է ցուցաբերում ատամնաբուժության ոլորտում՝ կիրառելով արհեստական բանականություն և միկրոբիոմային գիտության նորագույն նվաճումները:
Ritual Dental-ն առանձնանում է իր կանխարգելիչ մոտեցմամբ՝ հնարավորություն ընձեռելով հայտնաբերել բերանի խոռոչի առողջության խնդիրները նախքան դրանց առաջացումը: Ընկերությունն օգտագործում է միկրոբիոմային թեստեր, ԱԲ ախտորոշում և շարունակական մոնիթորինգ՝ յուրաքանչյուր հիվանդի համար անհատականացված բարձրորակ խնամք ապահովելու նպատակով:
«Ritual Dental-ը եզակի հնարավորություն է ներկայացնում ատամնաբուժական ոլորտում», – նշել է SmartGateVC-ի գործընկեր Աշոտ Արզումանյանը: «Կանխարգելիչ խնամքի նկատմամբ իրենց նորարարական մոտեցմամբ և առաջադեմ տեխնոլոգիաների կիրառմամբ, նրանք ստեղծում են ատամնաբուժական ծառայությունների նոր ստանդարտ»:
Ներկայումս Ritual Dental-ը գործում է Նյու Յորքի Տրայբեքա թաղամասում՝ առաջարկելով համապարփակ ատամնաբուժական ծառայություններ թե՛ մեծահասակների, թե՛ երեխաների համար: Ընկերությունը նպատակ ունի ստեղծել ատամնաբուժական կլինիկաների ցանց, որը կմիավորի բարձր տեխնոլոգիաները, գիտական նորագույն նվաճումները և անհատականացված սպասարկումը:
SmartGateVC-ն Հայաստանում և Կալիֆորնիայում գործող նախասաղմնային/սաղմնային վենչուրային կապիտալի ընկերություն է: Հիմնադրամի ներդրումային հիմնական ուղղություններն են արհեստական բանականությունը, ուղեղ-համակարգչային ինտերֆեյսը (BCI) և կիբեռանվտանգությունը: Հիմնադրամը ղեկավարվում է փորձառու տեխնոլոգիական ներդրողների, ձեռնարկատերերի և ոլորտի մասնագետների կողմից:
