Ապրիլի 2-ին հայ հիմնադիրներ ունեցող առաջին միաեղջյուր (Unicorn) տեխնոլոգիական ընկերություն ServiceTitan-ը հայտարարել է Convex ընկերությունը գնելու համաձայնագիր ստորագրելու մասին։
Տարիներ շարունակ ServiceTitan-ը և Convex-ը իրարից անկախ ստեղծել են ծրագրային լուծումներ կոմերցիոն ծառայություններ մատուցող ընկերությունների և կապալառուների համար։
Այժմ երկու ընկերությունները միավորում են ուժերը՝ էլ ավելի բարելավելու իրենց հաճախորդների աշխատանքային ամենօրյա գործունեությունը և եկամտաբերությունը։
Convex-ը վաճառքի և առաջխաղացման առաջատար հարթակ է, որն ստեղծված է հատուկ կոմերցիոն բիզնեսներին սպասարկող կապալառուների համար: 2017-ին հիմնադրված ընկերությունն արդիականացնում է այս ոլորտը տվյալների վրա հիմնված լուծումներով, որոնք մեծացնում են կապալառուների եկամուտը՝ բարելավելով նրանց ռազմավարություններն ու դրանց իրագործումը:
«ServiceTitan-ի առաքելություննն է ստեղծել տեխնոլոգիական այնպիսի լուծումներ, որոնք զգալիորեն կբարելավեն յուրաքանչյուր կապալառուի կյանքը», – ասում է ServiceTitan-ի գործադիր տնօրեն և համահիմնադիր Արա Մահդեսյանը, – «Այս պահին հատկապես կենտրոնացած ենք կոմերցիոն բիզնեսներին սպասարկող ընկերությունների համար բարձր եկամուտ ապահովող, նպատակային աշխատող ծրագրի մատուցման վրա»:
«Այս շուկայում աշխատող ընկերությունները արժանի են այնպիսի հարթակի, որն աշխատում է նույնքան ջանասիրաբար, որքան նրանք՝ հարթակ, որը կարող է օգնել նրանց գործել և ապահովել շահութաբեր աճ գալիք տասնամյակների ընթացքում: Անչափ ուրախ եմ ողջունել Convex-ին ServiceTitan ընտանիքում։ Մենք միավորում ենք ուժերը՝ միասին շարունակելու այս առաքելությունն իրականություն դարձնելու ճանապարհը», – ասում է Արա Մահդեսյանը:
Վահե Կուզոյանի և Արա Մահդեսյանի` 2012-ին հիմնադրած ServiceTitan-ը հեղինակավոր Forbes պարբերականի կազմած՝ ամպային տեխնոլոգիաների ոլորտի 100 լավագույն մասնավոր ընկերությունների ցանկում 5-րդն է։
Ընկերության հայաստանյան գրասենյակը բացվել է 2018-ի դեկտեմբերին՝ սկզբում ունենալով ընդամենը հինգ աշխատակից։ Այսօր Հայաստանի գրասենյակում աշխատում է ավելի քան 400, իսկ ամբողջ աշխարհում ընկերության աշխատակիցների թիվն անցնում է 2800-ը։ Ընկերության առաջարկած ծրագրային ապահովումից օգտվում է ավելի քան 100 000 կապալառու ԱՄՆ-ում և Կանադայում։ Այս բոլոր թվերը շարունակաբար աճում են։
Կարդացե՛ք նաև.
Ի՞նչ արդյունքներ է գրանցել ՏՏ ոլորտը վերջին տարում
2023-ին SADA-ն գեներատիվ AI-ի և մեքենայական ուսուցման նախագծերի ավելի քան 300% աճ է գրանցել
Հայկական Activeloop-ը 11 միլիոն դոլար է ներգրավել
Տեխնոլոգիական և բիզնես ոլորտի այլ նորությունների ծանոթացե՛ք՝ միանալով մեր Տելեգրամյան ալիքին։
