2025 թվականի հունիսի 30-ից սկսած, Ռուսաստան մեկնելու համար ոչ վիզային ռեժիմի երկրների քաղաքացիները՝ այդ թվում Հայաստանի քաղաքացիները, պարտավոր են լինելու մուտքից առնվազն 72 ժամ առաջ տեղեկացնել ՌԴ պատկան մարմիններին իրենց այցի մասին։ Այս մասին հայտնի է դարձել Ռուսաստանի միգրացիոն օրենսդրության փոփոխությունների շրջանակում։
Նոր կարգավորումների համաձայն՝ քաղաքացիները պետք է նախապես գրանցում կատարեն RuID անունով գործարկվող միասնական բջջային հավելվածում։ Գրանցվելուց հետո անձը ստեղծում է անձնական էջ, որտեղ մուտքագրում է անձնական տվյալները և ներկայացնում դիմում՝ Ռուսաստան մուտք գործելու վերաբերյալ։
Դիմումի հիման վրա համապատասխան մարմինները կուսումնասիրեն տվյալները, և մուտքի թույլտվության դեպքում քաղաքացին կստանա հատուկ կոդ, որը պետք է ներկայացնի սահմանային վերահսկողության ընթացքում։
Հավելվածում գրանցումը պարտադիր է բոլորի համար՝ անկախ ուղևորության նպատակից։ Բացառիկ՝ արտակարգ դեպքերում, տեղեկացումը կարող է իրականացվել մուտքից մինչև 4 ժամ առաջ։
Կոդի բացակայության դեպքում մուտքը Ռուսաստանի Դաշնություն չի թույլատրվի։
