Ignite 2024 միջոցառմանը Microsoft-ը ներկայացրել է Windows 365 Link-ը, գրում է techcrunch.com-ը։ Այն ամպային հոսթինգով փոքրիկ սեղանի համակարգիչ է, որը չունի սեփական օպերացիոն համակարգը։ Այն ունի սովորական Windows-ի ինստալացիա, բայց աշխատում է հեռավոր սերվերի վրա: Windows 365 Link-ը նույնիսկ չի կարելի համակարգիչ անվանել, քանի որ սարքը չի կարող տեղադրել և գործարկել հավելվածներ:
Windows 365 Link-ը նախատեսվում է գործարկել հաջորդ ապրիլին՝ հատուկ շուկաներում՝ 349 դոլարով։ Սարքը, ըստ Microsoft-ի, բեռնվում է «վայրկյանների ընթացքում», աջակցում է երկու 4K մոնիտորների միացմանը, հագեցած է չորս USB պորտով, աուդիո խցիկով և լարային Ethernet ցանցի ադապտերով, ինչպես նաև անլար ինտերֆեյսների ստանդարտ հավաքածուով, ինչպիսիք են Wi-Fi-ը, 6E-ն և Bluetooth 5.3-ը: Նոր արտադրանքը հագեցած է պասիվ հովացման համակարգով։
Windows 365 Link-ը կարող է գործարկել մի շարք հավելվածներ, այդ թվում՝ Office, Microsoft Teams և Webex հավելվածները, սակայն այն չունի ներկառուցված պահեստ, ուստի չի կարող տեղական ծրագրեր տեղադրել կամ աշխատել առանց ինտերնետ կապի: Սակայն, ըստ արտադրողի, սարքը բարձր անվտանգություն ունի, մասնավորապես, անվտանգության գործառույթներն անջատելը և առանց գաղտնաբառի մուտք գործելն անհնար է:
Արտադրողի խոսքով՝ նոր համակարգիչների հիմնական սպառողները կլինեն ոչ թե ֆիզիկական անձինք, այլ կոմերցիոն ընկերություններն ու պետական կազմակերպությունները։ Microsoft-ն ընդգծում է այս սարքերի հեռակառավարման հարմարավետությունը, արագ կարգավորումը և թարմացումների ավտոմատ ներբեռնումն ու տեղադրումը:
Microsoft-ն առանձահատուկ ընգծում է Windows 365 Link-ի էկոլոգիապես մաքուր լինելը։ Ընկերության տվյալներով դրա վերին ծածկը պատրաստված է 90%-ով վերամշակված ալյումինի խառնուրդից և այն ավելի քիչ էներգիա է օգտագործում, քան օգտագործում են սեղանի համակարգիչներից շատերը:
