ԱՄՆ ֆոնդային բորսաներում ապրիլի 10-ին գրանցվել է պատմական աճ այն բանից հետո, երբ նախագահ Դոնալդ Թրամփը հայտարարեց, որ 90 օրով դադարեցնում է «փոխադարձ» մաքսատուրքերի կիրառումը այն երկրների նկատմամբ, որոնք չեն պատասխանում նույն ձևով։ Թրամփը նաև նշել է, որ այդ ընթացքում կիրառվելու է 10% իջեցված սակագին, ինչը շուկայի համար ընկալվեց որպես սպասված «թեթևություն»՝ վերացնելով վատագույն սցենարները։ Այդ հայտարարությունը բավարար էր, որ հիմնական ինդեքսները գրանցեն տասնամյակների լավագույն ցուցանիշները․ S&P 500-ը աճել է 9.5%-ով, Nasdaq-ը՝ 12.1%-ով, իսկ Dow Jones-ը՝ մոտ 2962 կետով։
Տեխնոլոգիական հսկաները առաջնորդել են աճը։ Nvidia-ի բաժնետոմսերն ավելացել են 18.7%-ով, Tesla-ն՝ 22%-ով, իսկ Apple, Meta և Amazon ընկերությունները համապատասխանաբար աճել են 15.3%, 14.8% և 12%-ով։ Չնայած Չինաստանի նկատմամբ մաքսատուրքերի բարձրացմանը մինչև 125%, չինական ընկերություններից որոշներն էլ են վերականգնվել․ Alibaba-ն և JD.com-ը աճել են համապատասխանաբար 5% և 6%-ով։
Շուկայում ակտիվությունը հասել է ռեկորդային մակարդակների։ Ըստ ֆինանսական տարբեր աղբյուրների՝ ապրիլի 10-ին գրանցվել է 845.4 միլիարդ դոլար շրջանառություն, ինչը գերազանցել է ապրիլի 7-ի նախկին ռեկորդը։ Մեծագույն շրջանառությամբ առաջատարներն են՝ Nvidia՝ 66.3 միլիարդ, Tesla՝ 55.8 միլիարդ և Apple՝ 35 միլիարդ դոլար։ Բազմաթիվ ընկերությունների բաժնետոմսեր միաժամանակ սահմանել են ռեկորդներ թե՛ անկայունության, թե՛ կապիտալիզացիայի աճի և թե՛ գործարքների ծավալների մասով։
Չնայած այս ոգևորությանը՝ իրավիճակը դեռևս հեռու է կայունությունից։ Wall Street-ի վերլուծաբանները նշում են, որ անկայունությունը մնում է չափազանց բարձր՝ փետրվարի համեմատ ավելի քան տասնապատիկ։ Goldman Sachs-ը նույնիսկ կանխատեսել էր ռեցեսիա, սակայն Թրամփի հայտարարությունից հետո վերադարձավ իր նախնական՝ ոչ ռեցեսիոն կանխատեսմանը՝ 0.5% ՀՆԱ-ի աճի սպասումով և 45% ռեցեսիայի հավանականությամբ։
Այս պահին շուկան տոնում է հաղթանակը՝ գոնե կարճաժամկետում խուսափելով տնտեսական աղետից։ Բայց ինչպես նշում է Piper Sandler-ի գլխավոր ներդրումային ստրատեգ Մայքլ Կանտրովիցը՝ «եթե չլինի փոխադարձ մաքսատուրքերի վերաբերյալ 180 աստիճանի շրջադարձ, ապա կարծում եմ, որ շուկան արդեն հասել է իր նվազագույն կետին» ինչը հուշում է, որ այս աճը կարող է լինել կայուն։
