ՀՀ պետական եկամուտների կոմիտեն և էկոնոմիկայի նախարարությունը ներկայացրել են Ադրբեջանի տարածքով տարանցիկ փոխադրումների և ադրբեջանական ծագման ապրանքների ներկրման վերաբերյալ վիճակագրական տվյալներ։ Ըստ «Արմենպրես»-ի՝ 2025 թվականի նոյեմբերից մինչև 2026 թվականի ապրիլի 15-ը Ռուսաստանից և Ղազախստանից Ադրբեջանի տարածքով Հայաստան է ներկրվել ընդհանուր առմամբ 26 հազար 295 տոննա ապրանք։ Երկաթուղային տարանցման այս ուղին առաջին անգամ գործարկվել է 2025 թվականի նոյեմբերի 6-ին։
Տարանցիկ բեռների հիմնական մասը կազմել է ցորենը՝ 24 հազար 865 տոննա, որին հաջորդում են պարարտանյութերը՝ 1362 տոննա և հնդկացորենի ձավարը՝ 68 տոննա։ Պաշտոնական գերատեսչությունների գնահատմամբ՝ տարածաշրջանային գործակցության և խաղաղության հաստատմանն ուղղված քայլերի արդյունքներն արդեն իսկ տեսանելի են տնտեսական զարգացման նոր հնարավորությունների ձևավորման տեսանկյունից։
Զուգահեռաբար տվյալներ են հրապարակվել նաև Ադրբեջանից ներկրվող վառելիքի վերաբերյալ, որը Հայաստան է հասել Վրաստանի տարածքով՝ երկաթուղային տրանսպորտի միջոցով։ 2025 թվականի դեկտեմբերից մինչև 2026 թվականի ապրիլի 15-ն ընկած ժամանակահատվածում ներմուծվել է 9 հազար 337 տոննա ադրբեջանական ծագման վառելիք, որի ընդհանուր մաքսային արժեքը կազմել է 7.2 մլն ԱՄՆ դոլար։ Ներկրված ծավալից 5 հազար 398 տոննան եղել է դիզելային վառելիք (4.3 մլն դոլար), իսկ 3 հազար 939 տոննան՝ բենզին (2.9 մլն դոլար)։
