Twitter-ի սեփականատեր Իլոն Մասկը հայտարարել է, որ կհրաժարվի Twitter-ի գործադիր տնօրենի պաշտոնից, եթե նման որոշում կայացնեն հարթակի օգտատերերը։
Այս գիշեր նա առցանց հարցում է կազմակերպել և խոստացել ենթարկվել հարցման արդյունքներին։
«Արդյո՞ք ես պետք է հրաժարվեմ Twitter-ի ղեկավարի պաշտոնից: Ես կենթարկվեմ հարցման արդյունքներին», — գրել է նա: Այնուհետև մեկնաբանություններ թողել հարցման տակ, որոնցից մեկում մասնավորապես ասում է՝ «Վախեցեք սեփական ցանկություններից, դրանք կարող են իրականանալ»։
Այս պահին հարցմանը կողմ է քվեարկել օգտատերերի 57.5%-ը, իսկ դեմ՝ 42.5%-ը։ Ընդհանուր առմամբ հարցմանը դեռևս մասնակցել է 16.6 մլն օգտատեր։
Սա առաջին դեպքը չէ, երբ Մասկը որոշում է կայացնում Twitter-ի օգտատերերի հարցումներով:Օրինակ, 2021-ին օգտատերերի քվեարկությամբ Իլոն Մասկը վաճառել էր Tesla-ում իր բաժնետոմսերի 10%-ը (այն ժամանակ փաթեթն արժեր մոտ 21 միլիարդ դոլար):
