Դավիթ Յանի համահիմնադրած ամերիկյան Newo.ai ստարտափը ներգրավել է 25 միլիոն դոլարի Series A ներդրում։ Ներդրումը գլխավորել է Veeam ընկերության հիմնադիր Ռատմիր Տիմաշևը։ Ընկերության ընդհանուր ներգրաված կապիտալը հասել է 32 միլիոն դոլարի։
Newo.ai-ը ստեղծում է ձայնային AI «ընդունարանի աշխատակիցներ», որոնք նախատեսված են փոքր և միջին բիզնեսների համար՝ ատամնաբուժարաններ, ռեստորաններ, սպասարկման ծառայություններ և այլ ոլորտներ։ Ընկերության տվյալներով՝ բիզնեսների մուտքային զանգերի շուրջ 62%-ը մնում է անպատասխան, ինչի հետևանքով նրանք կորցնում են եկամուտ։
Պլատֆորմը մշտապես հասանելի AI գործակալներ է տրամադրում, որոնք կարող են պատասխանել զանգերին, SMS և WhatsApp հաղորդագրություններին, ամրագրել հանդիպումներ, որակավորել հաճախորդներին և անհրաժեշտության դեպքում փոխանցել զանգը մարդ օպերատորին։ Համակարգը աշխատում է Google Vertex AI-ի վրա և օգտագործում է Gemini 2.5 Flash մոդելը՝ արագ և բնական ձայնային պատասխաններ ապահովելու համար։
Ընկերությունը հայտնում է, որ 2025 թվականի վերջում իր եկամուտը կրկնապատկվել է, իսկ ակտիվ գործակալների թիվը գերազանցել է 15,000-ը։ Օրինակ՝ Image Orthodontics-ը մեկ եռամսյակում լրացուցիչ 400,000 դոլարի եկամուտ է ստացել՝ AI-ի միջոցով գրանցելով աշխատանքային ժամերից դուրս բաց թողնված ամրագրումները։
Ընկերությունը հիմնադրվել է 2023 թվականին Լուբա Ռեյնի և Դավիթ Յանի կողմից։ Նոր ներդրումը կուղղվի տարբեր ոլորտներում ընդլայնմանը, գործընկերային ցանցի զարգացմանը և Gemini տեխնոլոգիայի հետ ավելի խորը ինտեգրմանը՝ ավելի բարդ աշխատանքային գործընթացներ ավտոմատացնելու համար։
