Ֆինանսների աշխարհում մի բան կա, որը չի կարելի գնել, վաճառել կամ հետ բերել. դա՝ ժամանակն է։ Մարդիկ հաճախ կենտրոնանում են ճիշտ գործիքներ կամ ամենաշահավետ ընկերությունները գտնելու վրա, բայց հաճախ մոռանում են՝ ներդրումային պրոցեսներում ժամանակը կարող է փոխել ամեն ինչ։
Ներդրումների ոլորտում ժամանակը պարզապես ժամացույցի սլաք չէ. այն կրում է բարդ որոշումների, համբերության և վստահության ազդեցությունը։ Հաջողակ ներդրողների պատմություններն ուսումնասիրելիս կնկատեք, որ նրանց հաջողության հիմքում ոչ միայն խելացի ընտրությանն է, այլ՝ հենց ժամանակի նկատմամբ ունեցած հարգանքն ու երկարաժամկետ մտածողությունը։
Ժամանակը՝ համալրվող տոկոսադրույքի գաղտնի զենքը
Ֆինանսների աշխարհում կա մի երևույթ, որն հաճախ անվանում են «համալրվող տոկոսադրույքի հրաշք» — և դա անվերջ աճի պարզ, բայց հզոր մեխանիզմ է։
Սակայն սա պարզապես տեսական սահմանում չէ․ այն կարելի է դիտարկել որպես իրական կյանքում կիրառվող բնական գործընթաց։
Պատկերացրեք՝ տարեկան հաստատուն եկամտաբերությամբ որոշակի գումար եք ներդրում։ Առաջին տարում եկամուտ եք ստանում ձեր ներդրումից։ Հաջորդ տարում եկամուտ եք ստանում ոչ միայն բուն ներդրումից, այլ նաև նախորդ տարվա եկամտից։ Եվ այսպես՝ յուրաքանչյուր նոր տարում տոկոսները հաշվարկվում են արդեն աճած գումարի վրա։ Այս երևույթը նման է ձնագնդի։ Որքան շուտ սկսեք գլորել «ֆինանսական ձնագունդը», այնքան ավելի լավ արդյունք կստանաք։ Համալրվող տոկոսադրույքը պարզապես թվերի մասին չէ։ Այն ցույց է տալիս, թե ինչպես կարող է ժամանակը քայլ առ քայլ մեծացնել ձեր գումարը։
Ժամանակը հաղթում է ժամանակավոր շուկային
Շուկան հաճախ կարող է անկանխատեսելի լինել։ Այս տարին կարող է լինել բարձր եկամտաբերությամբ, մյուսը՝ կորուստներով լի։ Բայց, ժամանակի ընթացքում, շուկան աճելու ընդհանուր միտում է ցույց տալիս։ Նույնիսկ, եթե ներդրումներ եք անում ոչ ամենահարմար պահին, ժամանակի ընթացքում դեռ կարող եք շահել։ Պատճառն այն է, որ երկարաժամկետ հեռանկարում շուկան սովորաբար «հարթում» է կարճաժամկետ տատանումներն ու կորուստները։
Դրա համար էլ աշխարհի ամենահաջողակ ներդրողներն ասում են՝ «Time in the market beats timing the market»։
Ժամանակը նվազեցնում է ռիսկերը
Շատ սկսնակ ներդրողներ փորձում են «որսալ լավագույն պահը», բայց շուկայի կարճաժամկետ շարժը կանխատեսել գրեթե անհնար է նույնիսկ փորձառուների համար։ Երբ ներդրում եք կատարում երկարաժամկետ հեռանկարով, այդ ճնշումը վերանում է։ Ժամանակը թույլ է տալիս գործել ավելի հանգիստ ու հետևողական՝ առանց շուկայական տատանումներից վախենալու։ Արդյունքում ռիսկը նվազում է։
Ժամանակն աշխատում է նույնիսկ ամենապասիվ ներդրողի համար
Ներդրումներ կատարելը պարտադիր չէ, որ ամենօրյա բնույթ կրի։ Կարող եք ընտրել պասիվ ռազմավարություններ՝ ինդեքսային ֆոնդեր, կենսաթոշակային ծրագրեր կամ ավտոմատացված ներդրումային հարթակներ։ Տարեցտարի, նույնիսկ առանց ակտիվ միջամտության, ձեր պորտֆելը կաճի՝ միայն այն պատճառով, որ ժամանակը իր գործն անում է։ Սա հիանալի է նրանց համար, ովքեր ամեն օր շուկայի փոփոխություններին հետևելու ժամանակ կամ ցանկություն չունեն։
Ժամանակը բերում է նաև հմտություն և զգոնություն
Ոչ միայն գումարն է աճում ժամանակի ընթացքում, այլև՝ ձեր գիտելիքը։ Ավելի երկար ճանապարհ անցած ներդրողները սովորում են.
- ինչպես վերլուծել շուկան առանց էմոցիաների,
- ինչպես գնահատել ռիսկը,
- ինչպես ձևավորել դիվերսիֆիկացված պորտֆել։
Այս ամենը բերում է առավել մտածված որոշումների, որոնք երկարաժամկետ հեռանկարում դարձյալ աշխատում են ձեր օգտին։
Եզրակացություն
Անկախ նրանից՝ նոր եք սկսում ներդրումներ կատարել, թե արդեն փորձառու եք, ժամանակը մնում է միակ գործիքը, որը մշտապես ձեր կողքին է։ Եթե այն խելամտորեն օգտագործեք, համբերատար լինեք և պարբերաբար ներդրումներ կատարեք, արդյունքը հաճելիորեն կզարմացնի ձեզ։
Մի սպասեք «ավելի հարմար պահի»։ Լավագույն օրը այսօր է։
Ինչպե՞ս կատարել ներդրում
Բացե՛ք անվճար բրոքերային հաշիվ Unibank Invest-ի միջոցով և սկսեք իրականացնել ներդրումներ։ Unibank Invest հավելվածը թույլ է տալիս մուտք գործել աշխարհի խոշորագույն բորսաներ և ձեռք բերել միջազգային ներդրումային գործիքներ, ինչպիսիք են բաժնետոմսերը, պարտատոմսերը և ETF-երը։
Բրոքերային հաշիվ բացելու համար լրացրեք առցանց հայտը կամ զանգահարեք +374 43 004 382 հեռախոսահամարով։
