Որքան ուժեղ է ալկոհոլը, այնքան ավելի արագ են լողում մինի-բոտերը։ Հարվարդի համալսարանի գիտնականները՝ Ջեքսոն Ուիլթի գլխավորությամբ, ցուցադրել են 3D տպիչով տպված լողացող բոտեր, գրում է Techspot.com-ը։
Մոտ մեկ սանտիմետր տրամագծով ամեն բոտ բաղկացած է օդային խցիկից և վառելիքի փոքրիկ տարայից։ Սակայն ավանդական վառելիքի փոխարեն տարան լցվել է 10-ից 50% կոնցենտրացիայով սպիրտով:
Երբ բոտերը դրվել են ջրի մեջ, ալկոհոլն աստիճանաբար դուրս է հոսել փոքր անցքից՝ առաջացնելով այսպես կոչված Մարանգոնիի էֆեկտ։ Այս էֆեկտն առաջանում է, երբ մակերեսային լարվածության ավելի ցածր գործակից ունեցող հեղուկն արագորեն տարածվում է ավելի բարձր գործակից ունեցող հեղուկի վրա։ Այսպիսով, ալկոհոլը ստիպեց բոտերին շարժվել անցքի հակառակ ուղղությամբ։ Բոտերը մեկ «լիցքավորման» ժամանակ շարժվել են մինչև 500 վայրկյան՝ մոտ 6 սմ/վ արագությամբ։
Գիտնականներն ընդգծել են, որ շարժման արագությունն ուղղակիորեն կախված է ալկոհոլի կոնցենտրացիայից՝ նշելով, որ գարեջուրը ցանկալի ձգողականություն չի ապահովել։ Նրանք նաև օճառ են փորձել որպես վառելիք իրենց փորձերի համար: Նրանց կարծիքով, ալկոհոլը նախընտրելի է, քանի որ այն ուղղակի գոլորշիանում է անցքից դուրս հոսելուց հետո և չի աղտոտում ջրի մակերեսը։
Նշվում է, որ որոշ միջատներ օգտագործում են այս նույն երևույթը ջրի մակերևույթով սահելու համար: Սակայն ալկոհոլի բացակայության պատճառով նրանք ստիպված են ինքնուրույն առաջացնել ակտիվ նյութ, որը նրանց առաջ կտանի։
Հետազոտողները ասում են, որ իրենց փորձերը ավելին են, քան պարզապես զվարճանք: Նրանք կարծում են, որ ռոբոտները, որոնք հիմնված են շարժման նմանատիպ սկզբունքների վրա, կարող են օգտագործվել շրջակա միջավայրի վերականգնման կամ որոշակի արդյունաբերական գործընթացների ընթացքում ջրային մարմիններում նյութերը հավասարաչափ բաշխելու համար:
Բոտերը կարող են կիրառություն ունենալ կրթության մեջ՝ թույլ տալով գործնականում սովորել մակերեսային լարվածության հայեցակարգը:
