Հայաստանի ՏՏ ոլորտում գրանցված աշխատողների թիվն այս տարվա հուլիսի դրությամբ նախորդ տարվա նույն ժամանակաշրջանի համեմատ աճել է 43,8%-ով։ Այս մասին հայտնել է ԱԺ տնտեսական հարցերի մշտական հանձնաժողովի նախագահ Բաբկեն Թունյանը՝ հղում անելով աշխատողների թվաքանակի պաշտոնական վիճակագրությանը։
«Ըստ տնտեսության ոլորտների՝ տոկոսային առումով ամենամեծ աճը ցույց է տվել ՏՏ-ն՝ 43,8%, ՏՏ ոլորտում աշխատողների թիվը 20.7 հազարից հասել է մոտ 30 հազարի»,- ասել է Թունյանը։
Ավելի վաղ ՀՀ Էկոնոմիկայի նախարար Վահան Քերոբյանը հայտնել էր, որ Հայաստանը Ռուսաստանւց ընդունել է ավելի քան 50 հազար ՏՏ մասնագետ, երկրում գրանցվել է 850 ընկերություն և 350 անհատ ձեռնարկատեր ՌԴ-ից։ Բացի այդ 40 հազար իրավաբանական և ֆիզիկական անձիք ՀՀ բանկերում մոտ 100 հազար հաշիվ են բացել։
Տեխնոլոգիական և բիզնես ոլորտի այլ նորությունների ծանոթացե՛ք՝ միանալով մեր Տելեգրամյան ալիքին։
