Հայաստանը հայտնվել է հեղինակավոր The New York Times պարբերականի «52 Places to Go in 2026» ցանկում:
Որպես 2026 թվականի կարևորագույն իրադարձություն նշվում է մայիսին Երևանում կայանալիք Concours Mondial de Bruxelles գինու հեղինակավոր միջազգային մրցույթը: Հայաստանն ունի գինեգործության ավելի քան 6000 տարվա պատմություն և զբոսաշրջիկներին առաջարկում է շրջագայություններ գինեգործական չորս հիմնական տարածաշրջաններում: Այս ժառանգությունը համաշխարհային փորձագետների կողմից դիտարկվում է որպես երկրի այցեքարտերից մեկը:
Բացի գինեգործությունից, հոդվածում առանձնացվում են Հայաստանի բնական տարածքները, մասնավորապես՝ Սևանա լիճը, նրա ափամերձ հատվածները «Դիլիջան» ազգային պարկը:
Հատուկ անդրադարձ է կատարվում տարածաշրջանի կենսաբազմազանությանը, որտեղ պահպանվում են բույսերի հազվագյուտ և անհետացող տեսակներ:
Պարբերականը նշում է, որ Կովկասի սրտում գտնվող երկիրը տասնամյակներ շարունակ միշտ էլ գրավել է արշավների սիրահարներին, սակայն այժմ զբոսաշրջային հոսքերը առանձնահատուկ կտրուկ են աճում:
