Ի՞նչ է առաջարկում ծրագիրը
Կառավարության 355-Լ որոշմամբ հաստատված սուբսիդավորման ծրագիրն առաջարկում է նոր հնարավորություն հայաստանյան բիզնեսներին՝ ստանալու մատչելի ֆինանսավորում սարքավորումների ձեռքբերման և թվայնացման նախագծերի իրականացման համար։ Ծրագրի շրջանակներում բիզնեսները կարող են ստանալ 0-4% տոկոսադրույքով վարկեր կամ լիզինգ՝ ՀՀ բանկերի և ունիվերսալ վարկային կազմակերպությունների միջոցով։
Ո՞վ կարող է օգտվել
Ծրագրից կարող են օգտվել տարբեր ոլորտների ընկերություններ, ներառյալ՝ հանքագործական արդյունաբերությունը, մշակող արդյունաբերությունը, էներգետիկան, շինարարությունը, տրանսպորտը, տեղեկատվական տեխնոլոգիաները, կրթությունը, առողջապահությունը։
Ինչի՞ համար կարելի է օգտագործել ֆինանսավորումը
Ֆինանսավորումը կարող է օգտագործվել սարքավորումների ձեռքբերման, դրանց տեղադրման, սպասարկման, բիզնես գործընթացների թվայնացման, ISO ստանդարտների ներդրման և արտադրողականության բարձրացման խորհրդատվական ծառայությունների ձեռքբերման համար։
Գրավի պայմանները
Լիզինգային գործարքների դեպքում ձեռք բերվող սարքավորումն ինքնին հանդիսանում է գրավ, ինչը զգալիորեն պարզեցնում է ֆինանսավորման գործընթացը։
Հատուկ պայմաններ արտահանողների համար
Հատուկ պայմաններ են նախատեսված արտահանող ընկերությունների համար։ Եթե խորհրդատվական ծառայությունների արդյունքում ընկերության արտահանումը 20%-ով աճում է դեպի որևէ երկիր (բացառությամբ Ռուսաստանի և ԱՄԷ-ի), և ընկերությունն ունի ISO 9001 կամ ISO 27001 սերտիֆիկացում, պետությունը կվճարի վարկի մայր գումարի մնացորդի 50%-ը։
Խորհրդատուներին ներկայացվող պահանջները
Խորհրդատվական ծառայություններ մատուցող ընկերությունը, որին դիմելու է բիզնեսը, պետք է կա՛մ նախկինում առնվազն 50 մլն դրամի խորհրդատվություն տրամադրած լինի առաջատար միջազգային ընկերություններին, կա՛մ ունենա 1 մլրդ դրամը գերազանցող տարեկան շրջանառություն։
Ինչպե՞ս դիմել
Ծրագրից օգտվելու համար գործարարները կարող են դիմել ՀՀ ցանկացած բանկ կամ ունիվերսալ վարկային կազմակերպություն: Ֆինանսական հաստատությունները կուսումնասիրեն դիմումը և կառաջարկեն լավագույն լուծումը՝ հաշվի առնելով բիզնեսի կարիքները և հնարավորությունները:
Խնդիրը քարտեզագրվել է փոխվարչապետ Տիգրան Խաչատրյանի գլխավորությամբ գործող ՓՄՁ պետություն֊մասնավոր երկխոսության հարթակում։ Բարեփոխման փաթեթը մշակվել է IC Armenia-ի փորձագիտական թիմի կողմից՝ ՀՀ Էկոնոմիկայի նախարարության հետ համատեղ։
Ծրագրի մասին ավելի մանրամասն տեղեկություններ կարող եք ստանալ նաև ստորև տեղադրված տեսանյութից։
Կարդացե՛ք նաև՝
