OpenAI-ը գործարկել է GPT-5.3 Instant մոդելը, որն արդեն հասանելի է ChatGPT-ի բոլոր օգտատերերին, ինչպես նաև մշակողներին՝ API-ի միջոցով։ Ընկերության խոսքով՝ նոր տարբերակը նախատեսված է ամենօրյա զրույցները ավելի օգտակար, բնական և անմիջական դարձնելու համար։
GPT-5.3 Instant-ը փոխարինում է GPT-5.2 Instant-ին, որը ժամանակավորապես կմնա հասանելի միայն վճարովի օգտատերերի համար մոդելների ընտրության ցանկում և ամբողջությամբ կհեռացվի 2026 թվականի հունիսի 3-ին։
Ընկերության գնահատմամբ՝ GPT-5.2 Instant-ը երբեմն տալիս էր չափազանց «զգուշավոր» կամ «հաճոյացնող» պատասխաններ, իսկ որոշ դեպքերում հրաժարվում էր պատասխանել անվտանգ հարցերին։ Նոր տարբերակը զգալիորեն նվազեցնում է նման իրավիճակները․ այն ավելի հազվադեպ է մերժում հարցումները և խուսափում ավելորդ նախաբաններից։ Երբ անհրաժեշտ է կոնկրետ և օգտակար պատասխան, մոդելը փորձում է այն տրամադրել անմիջապես՝ առանց ավելորդ զգուշացումների։
GPT-5.3 Instant-ը նաև բարելավել է իր պատասխանների որակը՝ ինտերնետից ստացված տեղեկատվությունն օգտագործելիս։ Այն ավելի լավ է ճանաչում հարցման ենթատեքստը, տրամադրում է ամենահամապատասխան տեղեկատվությունը և համեմատում է գտնված տեղեկատվությունը իր սեփական «գիտելիքների և դատողությունների» հետ։ Ըստ ընկերության՝ նվազել է նաև «հալյուցինացիաների» մակարդակը, իսկ տեքստ գրելու առաջադրանքների դեպքում որակը բարձրացել է։
