Երևանի Նորագյուղ թաղամասը և «Պասկևիչի բլուր» կոչվող տարածքը նախատեսվում է լայնածավալ քաղաքաշինական ծրագրի շրջանակում վերափոխել «Երևան Դաունթաուն» բազմաֆունկցիոնալ միջազգային կենտրոնի։ Կառավարության հունվարի 29-ի նիստում որոշման նախագիծը հավանության է արժանացել։
Երևանի քաղաքապետ Տիգրան Ավինյանի խոսքով այս բարդ, բայց կարևորագույն ծրագիրը մի քանի խնդիր կլուծի, որոնցից ամենակարևորը կենտրոնի բեռնաթափումն է։
Խոսքը վերաբերում է մոտ 84 հեկտար տարածքի համալիր վերակառուցմանն ու նոր կառուցապատմանը, որի նպատակն է ստեղծել նոր, ժամանակակից քաղաքային կենտրոն, որը կլրացնի Երևանի ներկայիս կենտրոնը և կթեթևացնի նրա գերծանրաբեռնվածությունը։
Նախագծով նախատեսվում է․
- բազմաֆունկցիոնալ բնակելի, գործարար և հասարակական տարածքների ձևավորում,
- գրասենյակային շենքեր, հյուրանոցներ, բիզնես կենտրոններ,
- մշակութային և հասարակական նշանակության օբյեկտներ,
- նոր ճանապարհային ցանց և ենթակառուցվածքներ, մասնավորապես՝ Ծովակալ Իսակով-Արշակունյաց պողոտա նոր ճանապարհատվածը, որը կմիանա Մոնթե Մելքոնյան փողոցին։
Որոշմամբ կառավարությունը Երևանի քաղաքապետին լիազորել է պետության անունից պայմանագիր կնքել ձեռքբերող մասնավոր ընկերությունների՝ «ԴԻԹԻ ՔՈՆՍԹՐԱՔՇՆ» և «ԴԻԹԻ ԴԵՎԵԼՈՓՄԵՆԹ» ՓԲԸ-ների հետ։ Սա հիմք կհանդիսանա տարածքի նկատմամբ հանրության գերակա շահ ճանաչելու համար, ինչը թույլ կտա սկսել սեփականության օտարման և կառուցապատման գործընթացը։ Ըստ պաշտոնական հիմնավորման՝ DOWNTOWN քաղաքաշինական ծրագրի արդյունքում Երևանում կձևավորվի նոր՝ միջազգային չափորոշիչներին համապատասխանող թաղամաս՝ բնակելի շենքերով, միջազգային ներկայացուցչությունների և կազմակերպությունների գրասենյակային տարածքներով, գործարար և մշակութային կենտրոններով, սոցիալական ենթակառուցվածքներով, ինչպես նաև համաքաղաքային նշանակության կանաչ հանգստյան գոտով։ Նախագծով նախատեսվում է 70 հարկանի երկնաքերեր կառուցել:
