Netflix-ի բաժանորդների թիվը 10 տարվա ընթացքում առաջին անգամ կտրուկ նվազել է։
2022 թվականի առաջին եռամսյակում սթրիմինգային ծառայության բաժանորդների թիվը նվազել է 200 հազարով, այս մասին պարզ է դարձել ընկերության ֆինանսական հաշվետվությունից։
Առցանց կինոթատրոնների օգտատերերի թիվն ամբողջ աշխարհում նվազել է մինչև 221,64 միլիոն՝ նախորդ եռամսյակի 221,84 միլիոնի դիմաց։ Ընկերությունը կանխատեսում է ևս 2 միլիոն բաժանորդների կորուստ հաջորդ եռամսյակում։ Վերջին անգամ Netflix-ի բաժանորդների ընդհանուր թիվը նվազել է 2011 թվականին։
Այս միտման հնարավոր պատճառներից մեկը Հյուսիսային Ամերիկայում բաժանորդագրության արժեքի առաջին բարձրացումն է երկու տարվա ընթացքում (13,99 դոլարից մինչև 15,49 դոլար ամսական), որից հետո ծառայությունը կորցրեց 600,000 բաժանորդ:
Ընկերությունը նախազգուշացրել է ներդրողներին, որ եկամուտների աճը զգալիորեն դանդաղել է շուկայում մրցակցության աճի, «աշխարհաքաղաքական գործոնների» (ներառյալ Ուկրաինայի հակամարտությունը) և այլ մարդկանց հաշիվներից օգտվող հեռուստադիտողների թվի աճի պատճառով: Միայն Ռուսաստանից դուրս գալու պատճառով Netflix-ը կորցրել է 700 000 բաժանորդ։
Առաջիկայում Netflix-ը պատրաստվում է քայլեր ձեռնարկել այլ մարդկանց հետ գաղտնաբառերը «կիսելու» պրակտիկայի դեմ և արդեն մի քանի երկրում սկսել է թեստավորել երկրորդային օգտահաշիվների մոնիտիզացման նախագիծը։
Տեխնոլոգիական և բիզնես ոլորտի այլ նորությունների ծանոթացե՛ք՝ միանալով մեր Տելեգրամյան ալիքին։
