Դիլիջանում մեկնարկել են «Թումո ակադեմիա» վեցամսյա կրթական ծրագրի դասերը։
Ծրագրի նպատակն է 21 տարեկանը լրացած անձանց տրամադրել Թումոյում նոր մասնագիտություն ձեռք բերելու և կարիերա կառուցելու հնարավորություն։
Ակադեմիայի առաջին եռամսյա ինտենսիվ ուսուցման մասնակիցներն են Կողբի, Կապանի և Դիլիջանի Թումո կենտրոնների ապագա դասընթացավարները:
Նրանք կսովորեն երաժշտություն, անիմացիա, լուսանկարչություն, ֆիլմերի ստեղծում, խաղերի մշակում, եռաչափ մոդելավորում, նկարչություն, ստեղծագրություն, կուսումնասիրեն Թումոյի մանկավարժական մեթոդաբանությունն ու կպատրաստվեն կենտրոններում պրակտիկային:
Ակադեմիայում այս պահին կրթություն են ստանում ոչ միայն նշված համայնքներից, այլև Երևանից ծրագրին դիմած, տեղափոխվելու պատրաստակամությամբ երիտասարդներ:
Ծրագրի առաջին եռամսյակը հաջողած ուսանողները կանցնեն գործնական փուլ սեպտեմբերից և կդառնան Թումոյի թիմի լիարժեք աշխատակիցներ 2023-ի դեկտեմբերից։
Միացե՛ք How2B-ի Տելեգրամյան ալիքին՝ ամենահետաքրքիր հոդվածներն ու նորությունները բաց չթողնելու համար: