Ազգային ժողովը երկրորդ ընթերցմամբ և ամբողջությամբ ընդունեց «ՀՀ տոների և հիշատակի օրերի մասին» օրենքում լրացում կատարելու մասին նախագիծը։ Ըստ այդմ՝ հունվարի 27-ը Հայաստանում պաշտոնապես հռչակվում է Հայրենիքի պաշտպանության համար զոհվածների հիշատակի օր և լինելու է ոչ աշխատանքային։
Նախագծի համահեղինակներն են ԱԺ փոխնախագահ Ռուբեն Ռուբինյանը և պատգամավոր Գեղամ Նազարյանը։
Օրենքն ուժի մեջ է մտնում անմիջապես. կիրառվելու է այս տարվանից։
Առաջին ընթերցումից հետո նախագծում կատարվել է մեկ առանցքային փոփոխություն։ Ինչպես նշել է Ռուբեն Ռուբինյանը, օրենքն ուժի մեջ կմտնի ոչ թե պաշտոնական հրապարակմանը հաջորդող 10-րդ օրը, այլ անմիջապես։
Սա նշանակում է, որ արդեն մի քանի օրից՝ 2026 թվականի հունվարի 27-ին, Հայաստանը պետական մակարդակով և ոչ աշխատանքային ռեժիմով կնշի հիշատակի օրը։ Այս փաստը հաստատել է նաև հարակից զեկուցող, ԱԺ պետաիրավական հարցերի հանձնաժողովի անդամ Ալխաս Ղազարյանը։
Ինչո՞ւ հենց հունվարի 27-ը
Օրվա ընտրությունը խորհրդանշական է և կապված չէ կոնկրետ ռազմական գործողության հետ։ Հիմնական նպատակը Բանակի օրվա (հունվարի 28) հետ տրամաբանական կապ ստեղծելն է։
«Հունվարի 28-ին մենք նշում ենք Բանակի օրը։ Այսպիսով՝ հունվարի 27-ին կհիշատակենք և կխոնարհվենք հայրենիքի պաշտպանության համար զոհվածների առաջ («Երկնային բանակը»), իսկ հունվարի 28-ին՝ որպես շարունակվող կյանքի խորհրդանիշ, կտոնենք Բանակի օրը («Երկրային բանակը»)»,- պարզաբանել է Ռուբեն Ռուբինյանը։
Նա նշել է, որ խուսափել են կոնկրետ ռազմական իրադարձության օր ընտրելուց, որպեսզի հարց չառաջանա՝ «ինչու այս օրը և ոչ մյուսը»։
2026թ․ ոչ աշխատանքային օրերի ցանկը՝ այստեղ։
