Google ընկերությունը հայտարարել է, որ օգտատերերի այն հաշիվները, որոնք երկար ժամանակ ակտիվ չեն եղել և չեն օգտագործվել, կհեռացվեն: Գործընթացը կմեկնարկի 2023 թվականի վերջին:
Ըստ հայտարարության՝ 2 տարի շարունակ ոչ ակտիվ հաշիվները կջնջվեն: Դա կներառի նաև այն բովանդակությունը, որ նրանք պահպանել են WorkSpace, Youtube և Google Photos հարթակներում: Մինչև հաշիվը հեռացնելը Google-ը ամիսների ընթացքում մի քանի ծանուցումներ կուղարկի օգտատերերին: Ընդ որում, առաջին հերթին կհեռացվեն այն հաշիվները, որոնք չեն օգտագործվել ստեղծվելուց անմիջապես հետո:
Օգտատերերն իրենց հաշիվները «ակտիվ պահելու» համար պետք է մուտք գործած վիճակում օգտվեն համակարգի ծառայություններից գոնե մեկից՝ որոնում կատարեն, կարդան կամ ուղարկեն նամակներ, դիտեն տեսանյութ Youtube-ում կամ հավելված ներբեռնեն Google Play-ից, և այլն:
Նշված փոփոխությունները չեն վերաբերի բիզնես-հաշիվներին և ուսումնական հաստատություններին:
Միացե՛ք How2B-ի Տելեգրամյան ալիքին՝ ամենահետաքրքիր հոդվածներն ու նորությունները բաց չթողնելու համար: