Առաջատար տեխնոլոգիաների ձեռնարկությունների միությունը (ԱՏՁՄ) երեկ հայտարարությամբ է հանդես եկել ու իր մտահոգությունը հայտնել gg ընկերության և ընկերության հիմնադիր Խաչատուր Գրիգորյանի շուրջ տեղի ունեցող իրադարձությունների վերաբերյալ:
«ԱՏՁՄ-ի նպատակն է օժանդակել ՏՏ ոլորտի զարգացմանը։ Այս նպատակի իրագործման համար ԱՏՁՄ-ն կարևորում է “պետություն և ՏՏ համայնք” արդյունավետ համագործակցությունը և աջակցում է այդ համագործակցության զարգացմանը։ Միևնույն ժամանակ ԱՏՁՄ-ն կարևորում է բիզնեսի իրականացման ընթացքում օրինականության սկզբունքի պահպանումը, իսկ դրա խախտման (և խախտման հաստատման) դեպքում՝ համապատասխան հետևանքների կիրառումը: ՏՏ համայնքի անդամներից է gg ընկերությունը, որը հայկական բիզնեսի հաջողված օրինակներից է։ Այն իր տասնամյա գործունեության ընթացքում ոչ միայն դարձել է հայկական շուկայի ակտիվ դերակատարներից մեկը, այլև ընդլայնել է իր գործունեության աշխարհագրական տարածքը այլ երկրներ», – նշվում է ԱՏՁՄ-ի հայտարարությունում:
Միությունը մտահոգիչ է համարում gg ընկերության և ընկերության հիմնադիր Խաչատուր Գրիգորյանի շուրջ տեղի ունեցող իրադարձությունները՝ դրանք գնահատելով իբրև վատ ազդակ ՏՏ համայնքին և ՏՏ բիզնեսի հետագա զարցմանը՝ ընդգծելով, որ Ժողովրդավարական հասարակության կայացման գործընթացում կարևոր դեր է խաղում խոսքի ազատությունն ու կարծիքն ազատ արտահայտելու իրավունքը։
«Կայացած բիզնեսի ներկայացուցիչների կողմից ազատ կարծիքի արտահայտման հնարավորությունը նպաստելու է պետության և ժողովրդավարական հասարակության կայացմանը։ Իսկ կարծիք արտահայտելու համար քաղաքական ճնշման տպավորություն թողնող գործողությունները ոչ միայն խոչընդոտում են բիզնեսին, այլ նաև հանգեցնում են նրան, որ հասարակության ամենաստեղծարար հատվածներից մեկը զգալու է իրեն ձայնազուրկ, ինչն էլ միայն վնասելու է ժողովրդավարական պետության կայացմանը։ Ավելին, պետք է հստակ տարանջատել ընկերության հիմնադրին և ընկերությանը։ Դրանք տարբեր սուբյեկտներ են, իսկ հիմնադրի կարծիքը կամ արտահայտած տեսակետը չպետք է պատճառ դառնա բիզնեսի գործունեությանը որևէ կերպ խոչընդոտելու համար։ Այսուհանդերձ, այն հանգամանքը, որ դեռևս 2023 թվականին հարուցված քրեական գործի շրջանակներում քննչական գործողություն է կատարվում 15.06.2024 թվականին, gg ընկերության հիմնադրի կողմից սոցիալական մեդիայով արված հայտարարությունից անմիջապես հետո, առնվազն տեղիք է տալիս կասկածելու, որ gg ընկերությունում ձեռնարկված քննչական գործողությունները՝ խուզարկության տեսքով, հանդիսանում են gg ընկերության հիմնադրի հայտարարության հետևանք, և առկա է քաղաքական ենթատեքստ։ Արդյունքում տուժում է gg ընկերությունը։ Բարձրացած աղմուկը վնասում է gg ընկերության գործարար համբավին, իսկ ձեռնարկված խուզարկության արդյունքում գույքի (hամակարգիչներ և հեռախոսներ) առգրավումը խաթարում է տարիներ շարունակ խոշոր հարկատուների ցուցակում ընդգրկված ընկերության բնականոն աշխատանքը», – նշվում է ԱՏՁՄ-ի հայտարարությունում:
Միությունը վստահ է, որ տեղի ունեցածը ՏՏ համայնքի կողմից ընկալվում է որպես բացասական ազդակ և կարող է լուրջ խոչընդոտ դառնալ թե՛ Հայաստանի ՏՏ ոլորտում արդեն իսկ գործող ընկերությունների հետագա գործունեության, և թե՛ ՀՀ-ն որպես նոր աշխարհագրական տարածք դիտարկող ներդրողների համար։
«Այս տեսանկյունից, համապատասխան պետական մարմիններին կոչ ենք անում զերծ մնալ այնպիսի գործողություններից, որոնք կարող են հանգեցնել ոչ միայն ընտրովի արդարադատության իրագործման, այլև առհասարակ վնասել բիզնես միջավայրի զարգացմանն ու նոր ներդրումների ներգրավմանը», – նշվում է ԱՏՁՄ-ի հայտարարությունում։
Նշենք, որ հայ ՏՏ համայնքի մի շարք ներկայացուցիչներ նույնպես նմանատիպ հայտարարությամբ էին հանդես եկել՝ իրենց աջակցությունը հայտնելով gg ընկերությանը։
Հիշեցնենք, որ օրեր առաջ gg-ի սեփականատեր Խաչատուր Գրիգորյանն իր ֆեյսբուքյան էջում հայտարարել էր, որ մարդիկ իր հարգանքին արժանանալու համար պետք է Նիկոլ Փաշինյանի հրաժարականը պահանջեն՝ միանալով «Տավուշը հանուն հայրենիքի» շարժմանը, որի անդամ է ինքը։
«Եթե դու ՀԱՅ ԵՍ, եթե ինձ բարևելուց ուզում ես, որ ես քեզ հարգեմ քո տեղը ԲԱՂՐԱՄՅԱՆԻ վրա է !!!», – գրել էր Գրիգորյանը։
Այս հայտարարությունից հետո ՀՀ Քննչական կոմիտեն խուզարկություններ սկսեց ընդդիմադիր շարժմանն աջակցող gg ընկերության գլխամասում` մի քրեական գործի շրջանակում, որը հարուցվել էր դեռ մեկ տարի առաջ՝ հարկեր չվճարելու և փողերի լվացում հոդվածներով։
Միացե՛ք How2B-ի Տելեգրամյան ալիքին՝ ամենահետաքրքիր հոդվածներն ու նորությունները բաց չթողնելու համար:
