Google-ը նոր գործառույթ է ներկայացրել իր AI օգնական Gemini-ի համար, որը թույլ է տալիս հիշել նախորդ զրույցները և օգտագործել այդ համատեքստը պատասխաններում, գրում է The Verge-ը։
Թարմացումը հասանելի է Google One AI Premium-ի բաժանորդներին և նրանց հնարավորություն է տալիս շարունակել զրույցը AI-ի հետ՝ առանց մանրամասների հիշեցման: Նոր գործառույթն արդեն հասանելի է անգլալեզու Gemini վեբ և բջջային հավելվածում․ այլ լեզուների աջակցությունն ու Google Workspace-ի հետ ինտեգրումը սպասվում է առաջիկա շաբաթներին:
Բացի համատեքստը հիշելուց, նոր գործառույթն օգտատերերին թույլ է տալիս պահանջել նախորդ զրույցների ամփոփագրեր՝ հեշտացնելով աշխատանքը տեղեկատվության հետ և Gemini-ը դարձնելով ավելի օգտակար գործիք՝ այնպիսի երկարաժամկետ խնդիրներ լուծելու համար, որոնք պահանջում են տվյալների հետևողական վերլուծություններ: Օրինակ, օգտատերերը կարող են հետևել իրենց հարցումների փոփոխություններին կամ արագ հիշել նախկինում քննարկված գաղափարները։
Նախկինում Google-ը ներդրեց օգտատերերի նախապատվությունները հիշելու մեխանիզմ, սակայն այժմ AI օգնականը կարող է հաշվի առնել ոչ միայն տարբեր պարամետրերը, այլև երկխոսությունների ամբողջական կառուցվածքը, ինչը թույլ է տալիս կառուցել աշխատանք՝ հիմնվելով կուտակված համատեքստի վրա:
Օգտատերերը կարող են ցանկացած պահի կառավարել Gemini -ի հետ իրենց փոխգործակցության պատմությունը: Դա անելու համար պարզապես բացեք ձեր պրոֆիլը հավելվածում, գնացեք «Gemini Apps Activity» բաժինը և ընտրեք ցանկալի տարբերակները՝ «դիտել», «ջնջել» կամ «ամբողջությամբ մաքրել պահպանված տվյալները»: Այս մոտեցումը թույլ է տալիս ճկուն կերպով վերահսկել, թե արհեստական բանականության հետ շփման որ ասպեկտներն են մնում չաթբոտի հիշողության մեջ, և որոնք են ենթակա վերացման: Սա հնարավորություն է տալիս կարգավորել տվյալների գաղտնիության աստիճանը։
Հիշողության այս գործառույթն արդեն հասանելի է Google One AI Premium-ի բաժանորդներին՝ առայժմ միայն անգլերենով: Առաջիկա շաբաթների ընթացքում Google-ը նախատեսում է ընդլայնել իր աջակցությունը՝ ավելացնելով նոր լեզուներ և ինտեգրելով այս մեխանիզմը` Google Workspace Business և Enterprise կորպորատիվ պլաններում:
Դեռևս չկա ճշգրիտ ժամանակացույց, թե երբ գործառույթը կգործարկվի այլ լեզուներով։
Նշենք, որ նմանատիպ տեխնոլոգիաներ արդեն օգտագործվում են այլ AI չաթ-բոտերում, այդ թվում՝ ChatGPT-ում, որը կարող է նաև հիշել նախորդ զրույցների մանրամասները և հաշվի առնել օգտատերերի նախասիրությունները:
