Վերջին շաբաթվա ընթացքում Հայաստանում նոր տեսակի հեռախոսային խարդախություն է տարածվել, որի զոհերը հիմնականում տարեց քաղաքացիներն են: Խաբեբաները, օգտագործելով հուզական մանիպուլյացիա, կարողացել են շուրջ 28.3 միլիոն դրամ կորզել քաղաքացիներից:
Խարդախության սխեման հետևյալն է․ անհայտ անձինք զանգահարում են քաղաքային հեռախոսահամարներին, հաճախ թիրախավորելով տարեց մարդկանց: Նրանք հայտնում են, թե զանգահարողի հարազատը ենթարկվել է ավտովթարի կամ վրաերթի, և անհապաղ գումար է պահանջվում՝ բուժման կամ իրավական խնդիրները կարգավորելու համար:
ՆԳՆ խոսնակ Նարեկ Սարգսյանը հաստատել է, որ օգոստոսի 5-11-ը ընկած ժամանակահատվածում Ոստիկանությունը ստացել է 99 նմանատիպ ահազանգ: Դրանցից 14-ի դեպքում քաղաքացիները արդեն փոխանցել էին պահանջվող գումարը: 16.5 միլիոն դրամ, 690 000 ռուբլի, 17 600 դոլար և 4 700 եվրո․ այսքան գումար են փոխանցել մեր հայրենակիցները խաբեբաներին 7 օրվա ընթացքում։
Խարդախության այս տեսակը վտանգավոր է ոչ միայն ֆինանսական կորուստների, այլև զոհերի հոգեկան և ֆիզիկական առողջության համար: Տարեց մարդիկ, ովքեր ավելի խոցելի են նման մանիպուլյացիաների նկատմամբ, կարող են ենթարկվել լուրջ սթրեսի և առողջական խնդիրների:
Ոստիկանությունը կոչ է անում քաղաքացիներին զգոն լինել և չտրամադրել որևէ տեղեկատվություն կամ գումար անծանոթ անձանց: Կարևոր է նաև իրազեկել ընտանիքի տարեց անդամներին այս խարդախության մասին՝ հնարավոր զոհերի թիվը նվազեցնելու համար:
Եթե դուք կամ ձեր հարազատները ստացել եք նմանատիպ կասկածելի զանգ, անհապաղ դիմեք ոստիկանություն:
Կարդացեք նաև՝
- Զեղծարարների կողմից անձնական և բանկային տվյալներ ձեռք բերելու փորձերն ավելացել են. ԿԲ
- Փորձում են մարդկանց անունով կեղծ վարկեր ձևակերպել. նոր խաբեություն` Հայաստանում
Միացե՛ք How2B-ի Տելեգրամյան ալիքին՝ ամենահետաքրքիր հոդվածներն ու նորությունները բաց չթողնելու համար:
